काठमाडौं: कांग्रेस देशको जेठो पार्टी हो । विभिन्न कालखण्डमा परिवर्तनको नेतृत्व गरेको कांग्रेसले आफूलाई फेर्न सकेको छैन । १४औं महाधिवेशन स्थल भृकुटीमण्डप पुग्दा यस्तै भान हुन्छ । ‘अमूल्य मत दिएर मलाई जिताउनुस्’ लेखिएको ब्यानर यत्र-तत्र झुण्ड्याइएको छ । जसले महाधिवेशनस्थल कुरुप बनाएको छ ।
उम्मेदवारमा प्रचार सामग्री झुन्ड्याउने होडबाजी चलेको छ । कोही रहरले त कोही बाध्यताले प्रचारमा उत्रिएका छन् । सभागृहदेखि पद्मोदय क्याम्पससम्मका सडक किनार चुनावी प्रचार सामग्रीले भरिभराउ छ । कांग्रेसले मञ्च व्यवस्थान र स्वागतद्वार निर्माणमै ४० लाख खर्चेको छ ।
सडक छेकेर स्क्रिन बोर्ड राखेका छन्। जसले यातायात सञ्चालनमा कठिनाइ भइरहेको छ । महाधिवेशन स्थलमा भेटिएका सुनसरीका भोजराज घिमिरे भन्छन्, ‘कांग्रेस मात्रै होइन् नेपालका सबै राजनीतिक दल पुराना शैलीमा छन् । जस्तो प्रचारशैली अपनाएर कांग्रेसले महाधिवेशन गर्दै छ त्यो २०-२५ वर्ष अघिकै हो,’ उनले भने, ‘विश्व कहाँ पुगिसक्यो। विदेशीहरू आजभन्दा ५०-६० वर्षअघि नै डिजिटलको बाटोमा गइसके। उनीहरू आफ्ना भनाइ सामाजिक सञ्जालमा राख्छन् ।’
कांग्रेस अधिवेशन मंसिर २४-२७ सम्म छ । देशभरिबाट आएका प्रतिनिधिले भृकुटीमण्डप भरिभारउ हुन थालेको छ । पुतलीसडक, रत्नपार्क क्षेत्रमा ट्राफिक व्यवस्थापन भद्रगोल बनेको छ । नयाँ व्यवस्था ल्याए पनि दल आफैं भने परिवर्तन हुन सकेका छैनन् । ‘राजीनिक परिवर्तन गरे तर उनीहरू ढुंगे युगको व्यवहार गरिरहेका छन्,’ घिमिरेले भने । जब पार्टीहरू महाधिवेशन वा आमसभा गर्छन् त्यसको मारमा व्यवसायीमा पर्छ । उनीहरूसँग लिएको चन्दा नेताहरू फोहोर उत्पादन गर्न खर्च गरिरहेको सर्वसाधारण बताउँछन् ।
स्याङ्जाका युवराज पौडेल महाधिवेशन स्थलमा प्रचार सामग्री हेरिरहेको भेटिए । यस्तो प्रचारशैलीको विकल्प खोज्नुपर्ने उनको भनाइ छ । भने, ‘पुराना परिपाटीलाई बदल्न कुनै पनि राजनीतिक दलले एजेन्डा नै बनाएनन्,’ उनले भने, ‘अनलाइन प्रविधि, म्यासेज, सामाजिक सञ्जालबाट प्रचार गर्ने विकल्प छ । अरूले जे गर्यो मैले पनि गर्नुपर्छ भन्ने होडबाजीमा नेताहरू शक्ति प्रदर्शन गरिरहेका छन् । जसको कुनै अर्थ छैन ।’,याे समाचार अन्नपूर्ण पोष्ट दैनिकमा छापिएकाे छ ।
