६ पुस, एजेन्सी ।
भारतीय प्रधानमन्त्री नरेन्द्र मोदीले मध्य एसियाली पाँच देशका विदेशमन्त्रीसँग छलफल गरेका छन् ।
उनले सोमबार कजाकिस्तान, किर्गिज गणतन्त्र, ताजिकिस्तान, तुर्कमेनिस्तान र उज्बेकिस्तानका विदेश मन्त्रीसँग छलफल गरेका हुन् । भेटमा पाँच देशका विदेशमन्त्रीले भारतसँगको सम्बन्धलाई थप बलियो बनाउनुपर्नेमा जोड दिएका छन् ।
प्रधानमन्त्री मोदीले पनि दिगो र स्थायी सम्बन्धमा जोड दिएको भारतीय सञ्चारमाध्यमले जनाएका छन् । साथै उनले भारत र मध्य एसियाबीचको आर्थिक सहयोगको सम्भावना र कनेक्टिभिटीको भूमिकालाई पनि जोड दिएका छन् ।
भेटमा भारतीय विदेशमन्त्री एस जयशंकर र राष्ट्रिय सुरक्षा सल्लाहकार अजित डोभाल पनि उपस्थित थिए । भारत–मध्य एसिया संवादको तेस्रो बैठकमा सहभागी हुन मध्य एसियाली देशका विदेशमन्त्रीहरू नयाँ दिल्लीमा छन् ।
