१४ पुस, एजेन्सी ।
इजरायलमा पक्षीहरुमा लाग्ने एभियन फ्लुको महामारी फैलिएको छ। यो संक्रमण नियन्त्रणका लागि सरकारले १० हजारभन्दा धेरै टर्की मार्ने बताएको छ।
हुला नेचर रिजर्भमा यो संक्रमणको कारण पाँच हजारभन्दा धेरै प्रवासी सारस मरेका छन्। इजरायलका वातावरणमन्त्री तमर जेन्डबर्गले यसलाई इजरायलको इतिहासमा वन्यजन्तुको लागि सबैभन्दा ठूलो झट्का भएको बताएका छन्।
इजरायलले स्थानीय किसानहरुलाई ५ लाख कुखुरा मार्न पनि आग्रह गरेको छ। यसले आगामी दिनमा इजरायलमा कुखुराको अन्डा अभाव हुन सक्ने बीबीसीले उल्लेख गरेको छ।
यद्यपि एभियन फ्लु ए(एच५एन१) को संक्रमण अहिलेसम्म मानिसमा भने देखिएको छैन। इजरायलका प्रधानमन्त्री नेफ्टाली बेनेटले यस विषयमा शीर्ष अधिकारीहरुसँग छलफल गरेका छन्।
विश्व स्वास्थ्य संगठनका अनुसार पक्षीहरूबाट मानिसमा कुनै पनि भाइरस आउनु दुर्लभ घटना हो। यद्यपि अन्य जनावरमा पनि यसको संक्रमण सर्न सक्ने भन्दै सुरक्षा सतर्कता बढाइएको छ।
