१५ पुस, एजेन्सी ।
पछिल्लो समय युक्रेनको विषयलाई लिएर तनाव बढिरहेको बेला अमेरिकी राष्ट्रपति जो बाइडेन र रुसी समकक्षी भ्लादिमिर पुटिनबीच बिहीबार फोन वार्ता हुने भएको छ।
बीबीसीका अनुसार यसै महिना दोस्रोपटक बाइडेन र पुटिनबीच वार्ता हुन लागेको हो। बिहीबार हुने फोनवार्तामा उनहरुको बीचमा सुरक्षा र युरोपको अवस्थाको विषयमा कुराकानी हुनेछ। पश्चिमा मुलुकले युक्रेनमाथि रुसले आक्रमणको तयारी गरिरहेको आरोप लगाएका छन्।
पछिल्लो समय युक्रेनको सीमामा उसले ठूलो संख्यामा सैनिक परिचालन गरेको छ। त्यसैले पनि पश्चिमा मुलुक रुससँग सशंकित भएका हुन्।
रुसले युक्रेनको विषयमा उत्पन्न तनाव कम गर्न अमेरिकाको सहयोगी मुलुकको संगठन नेटोले पनि आफ्नो छिमेकी मुलुकमा सैन्य परिचालनको कार्य रोक्नुपर्ने शर्त राखेको छ।
उसले यस विषयमा वार्ताको लागि आफूहरु सधैं तयार रहेको बताउँदै आएको छ। यसअघि डिसेम्बरको सुरुमा बाइडेन र पुटिनबीच भर्चुअलरुपमा कुराकानी भएको थियो।
