२६ माघ, काठमाडौं ।
राष्ट्र उत्थान लघुवित्त वित्तीय संस्था लिमिटेडले फागुन ४ गतेदेखि सर्वसाधारणमा आईपीओ निष्कासन गर्ने भएको छ।
काभ्रेपलाञ्चोकको साँगामा केन्द्रीय कार्यालय रहेको संस्थाले आव २०७८–०७९ को दोस्रो त्रैमाससम्ममा गत आर्थिक वर्षको सोही अवधिको तुलनामा आकर्षक प्रगति हासिल गरेको छ।
संस्थाले खुद मुनाफमा १४८ प्रतिशत, रिजर्भमा ७९ प्रतिशत, कर्जा लगानीमा ६४ प्रतिशत, खुद व्याज आम्दानीमा ५७ प्रतिशतलगायत अधिकांश सूचकमा प्रगति हासिल गरेको जनाएको हो।
संस्थाले खराब कर्जा करिब ५९ प्रतिशत घट्न गई १.०३ प्रतिशतमा सीमित राख्न सफल भएको छ। संस्थाले हालसम्मको सञ्चित मुनाफा र चालु आर्थिक वर्षको बाँकी ६ महिनामा आर्जन गर्ने मुनाफाबाट आगामी वर्ष शेयरधनीहरुलाई करिब ५० प्रतिशतभन्दा बढी लाभांश सजिलै बाँड्न सक्ने बताइएको छ।
संस्थाको प्रकाशित आह्वानपत्रबमोजिम वित्तीय संस्थाको आर्थिक वर्ष ०७८–०७९ मा खुद मुनाफा करिब रु ८ करोड ५ लाख, आव ०७९–०८० मा रु १९ करोड ७३ लाख र आव ०८०–०८१ मा रु २७ करोड ५ लाख हुने र सोही अवधिमा प्रतिशेयर आम्दानी क्रमशः रु ३०.९८, रु ७५.९० र रु १०४.०४ हुने प्रक्षेपण गरिएको छ।
जसले भविष्यमा लगानीकर्ताहरुलाई राम्रो प्रतिफल दिन सक्ने देखिएको हुँदा ढुक्क भएर आईपीओमा लगानी गर्न संस्थाले आह्वान गरेको छ।
