४ फागुन, बीबीसी ।
अमेरिकी राष्ट्रपति जो बाइडनले युक्रेनमा रुसी हमलाको सम्भावना अझै उच्च रहेको भन्दै त्यसो भएमा निकै ठूलो मानवीय मूल्य चुकाउनुपर्ने बताएका छन्।
टेलिभिजनमा प्रसारित सम्बोधनमा उनले त्यस्तो अवस्थाका लागि जवाफ दिन अमेरिका दृढतापूर्वक तयार रहेको बताएका छन्।
बाइडनले अहिले पनि युक्रेनतर्फको सीमामा रुसले डेढ लाखजति सैनिक तैनाथ गरेको बताए। मस्कोले भने आफ्ना केही सैनिकहरू फर्कन थालेको घोषणा गरेको छ। बाइडनले युक्रेनको सीमाबाट रुसी फौज फिर्तीको खबरलाई अमेरिकाले अझै पुष्टि नगरेको बताए।
बाइडनले थप के भने ?
रुसी नागरिकहरूलाई सम्बोधन गर्दै बाइडनले उनीहरू आफ्ना शत्रु नभएको बताए।
तर हमलाको अवस्था आएमा प्रतिबन्ध लगाउन आफूहरू तयार भएर बसेकोमा उनको जोड थियो। रुसी रक्षामन्त्रीले केही फौजहरू फिर्ता गरिएको बताए पनि बाइडनले भने, ृरुसी फौज फर्कनु राम्रो काम हुनेछ, तर अझै हामीले त्यसको पुष्टि गरेका छैनौँ।
बरु हाम्रो समीक्षाले उनीहरू अहिले जोखिम सिर्जना गर्नसक्ने अवस्थामा रहेको सङ्केत गर्छ।
मस्कोको धारणा
पुटिनले मस्कोका सुरक्षा चासो सम्बोधन हुनुपर्ने र त्यसलाई गम्भीरतापूर्वक लिइनुपर्ने भनेको केही घण्टापछि बाइडनको सम्बोधन आएको हो।
पुटिनले हमलाको योजना बनाइरहेको भन्ने कुरालाई सधै अस्वीकार गरेका छन्। तर त्यस क्षेत्रमा नोभेम्बर महिनायता तनाव बढिरहेको छ। पूर्वी सोभियत गणराज्य युक्रेनसँग रुसको गहिरो सांस्कृतिक र ऐतिहासिक सम्बन्ध छ।
साइबर हमला
युक्रेनी अधिकारीहरूले आफ्ना रक्षा मन्त्रालय र दुईवटा ब्याङ्कका वेबसाइटहरू साइबर हमलामा परेको जनाएका छन्।
युक्रेनको साइबर सुरक्षा केन्द्रले त्यो कसले गराएको भन्ने आफूलाई थाहा नभएको तर रुसले नगरेको होला भन्न समेत नसकिने जनाएको छ। कयौँ घण्टासम्म रक्षा मन्त्रालयको वेबसाइटको मुख्यपृष्ठमा त्यसमा सुधारको काम भइरहेको जनाइएको थियो।
तर अहिले त्यसले काम गर्न थालेको छ। दुई ब्याङ्कले भुक्तानी र एप प्रणालीमा समस्या झेलेका थिए।
