१८ फागुन, एजेन्सी । अमेरिकी राष्ट्रपति जो बाइडनले रुसी राष्ट्रपति भ्लादिमिर पुटिनलाई एक तानाशाहको संज्ञा दिँदै युक्रेनमाथि गरेको अतिक्रमणको मूल्य चुकाउनुपर्ने बताएका छन् ।
युक्रेनमाथि सुनियोजित र बिनाउक्साहट आक्रमण गरेर रुसी राष्ट्रपति भ्लादिमिर पुटिनले गल्ती गरेको बाइडेनको भनाइ छ ।
संसदमा सम्बोधन गर्दै बाइडेनले पश्चिमा देशहरुलाई विभाजन गर्न सक्ने पुटिनको गलत आँकलन रहेको भन्दै पश्चिमी देश एकजुट रहेको बताए । उनले रुस अहिलेसम्मकै सबैभन्दा धेरै एक्लिएको दाबी पनि गरे ।
यसैबीच रुसी सेनाले युक्रेनको दोस्रो ठूलो सहर खार्किभलाई नियन्त्रणमा लिने प्रयास गरिरहेका छन् ।
विमानबाट ओर्लेका सेनाहरुले एउटा सैनिक अस्पतालमाथि आक्रमण गरेका र लडाइँ चलिरहेको युक्रेनी सेनाले जनाएको छ । रुसी सेनाले राजधानी किभलाई पनि घेरेर आक्रमण गरिरहेका छन् ।
यसैबीच रुसले आफ्ना नागरिकलाई १० हजार अमेरिकी डलरभन्दा बढी नगद लिएर देशबाहिर जान प्रतिबन्ध लगाएको छ ।
पश्चिमा देशका कडा प्रतिबन्धहरू लगाइरहेका बेला रुसी राष्ट्रपति पुटिनले आजदेखि लागु हुनेगरी यस्तो ओदश जारी गरेको अन्तर्राष्ट्रिय सञ्चारमाध्यमहरुले जनाएका छन् ।
पश्चिमा देशहरूको प्रतिबन्धका कारण रुसी अर्थतन्त्र र मुद्रामा समस्या बढीरहेको छ । रुसको शेयर बजार आज तेस्रो दिन पनि बन्द छ ।
