२० फागुन ,काठमाडौँ । सरकारले लगातार इन्धनको मूल्य बढाएपछि थप आर्थिक भार परेको भन्दै यातायात व्यवसायीहरुले आफैं सार्वजनिक सवारीको भाडादर समायोजन गर्ने चेतावनी दिएका छन् ।
डिजल–पेट्रोलको मूल्यले नयाँ रेकर्ड कायम गर्ने क्रम चलिरहँदा यातायात व्यवसायीले मूल्यवृद्धि फिर्ता लिन वा भाडा समायोजन गर्न माग गरेका हुन् । सरकारले बेवास्ता गरेर आफैंले भाडा समायोजन गरेर उठाउने नेपाल यातायात व्यवसायी राष्ट्रिय महासंघले चेतावनी दिएको छ ।
सरकारले बिहीबार राति मात्रै पेट्रोल र डिजलमा ५–५ रुपैयाँ प्रतिलिटरका दरले मूल्य बढाएको थियो । अब पेट्रोलको मूल्य प्रतिलिटर १५० रुपैयाँ र डिजल प्रतिलिटर १३३ रुपैयाँ पुगेको हो ।
पेट्रोलियमको मूल्यवृद्धि र गाडी भाडा वृद्धिको मार भने सार्वजनिक सवारीका प्रयोगकर्ताहरुलाई पर्ने अवस्था आएको छ । २७ असार २०७८ मा सरकारले सार्वजनिक सवारीको भाडा बढाए यता डिजल–पेट्रोलको मूल्य प्रतिलिटिर २५ रुपैयाँले बढेको छ । त्यसबेला असारमा भाडा समायोजन गर्दा पेट्रोलको मूल्य लिटरमा १२५ र डिजल १०८ रुपैयाँ प्रतिलिटर थियो ।
लगातार डिजल–पेट्रोलको मूल्य बढिरहेको भन्दै यातायात व्यवसायीले फेरि भाडा समायोजन गर्न माग गरेका हुन् । सवारीको वैज्ञानिक भाडा समायोजन गर्ने व्यवस्थाअनुरुप भाडादरमा पेट्रोलियम पदार्थको मूल्यको भार ३५ प्रतिशत छ ।
यातायात व्यवसायी राष्ट्रिय महासंघका महासचिव सरोज सिटौला पेट्रोलियमको मूल्य समायोजनको समयको तुलनामा प्रतिलिटर २५ रुपैयाँ महँगिएकाले गाडी चलाउँदाको लागत उठ्न छाडिसकेको दावी गर्छन् ।
महामारीको मारमा परेको व्यवसायलाई थप थिलोथिलो बनाउने गरी पटक–पटक भएको मूल्यवृद्धिको भार थेग्न सकिने अवस्था नरहेको व्यवसायीहरुको गुनासो छ ।
आफूहरु यात्रुलाई सुलभ दरमा सेवा दिन तयार भएपनि सरकारले उचित वातावरण बनाउनुको सट्टा थप बिगार्ने गरी मूल्य बढाइरहेको गरिरहेको सिटौलाको आरोप छ ।
कोरोना महामारीको चपेटामा परेका आम यातायात व्यवसायीहरुले बैंक व्याज किस्ता बुझाउन नसकेको अवस्थामा पेट्रोलियम पदार्थमा पटक–पटक मूल्यवृद्धि गरिँदा ठूलो समस्या परेको महासंघले जनाएको छ ।
पटक पटक ध्यानाकर्षण गराएपनि उपभोक्ता वर्गलाई पर्ने असरलाई समेत वेवास्ता गरी सोही क्रम जारी राख्दा समस्या भएको महासंघको निष्कर्ष छ ।
महासंघले विभिन्न सरकारी निकायमा ज्ञापनपत्र बुझाउँदै फागुन २५ गतेभित्र मूल्यवृद्धि फिर्ता लिन अल्टिमेटम दिएको थियो । सरकारबाट बढेको मूल्य फिर्ता नलिए र भाडा समायोजन नगरे बढेको मूल्यमा आधारमा महासंघले नै बाध्य भएर भाडा समायोजन गर्ने महासचिव सिटौलाले चेतावनी दिएका छन् ।
