३ चैत, एजेन्सी । अमेरिकी राष्ट्रपति जो बाइडनले पहिलोपटक रुसी राष्ट्रपति भ्लादिमिर पुटिनलाई ‘युद्ध अपराधी’ भनेका छन् ।
युक्रेनमा रुसले आक्रमण गरेपछि पुटिनको निन्दा गर्न बाइडेनले ‘युद्ध अपराधी’ भनेका हुन् ।
ह्वाट हाउसमा बुधबार आयोजित पत्रकार सम्मेलनमा एक पत्रकारको प्रश्नको जवाफ दिने क्रममा बाइडनले उक्त शब्द प्रयोग गरेको बीबीसीले जनाएको छ ।
यसबाट रुस र अमेरिकाबीच कूटनीतिक तनाव अझै बढ्ने अनुमान छ । रुसले बाइडेनको अभिव्यक्तिलाई ‘अक्षम्य’ भनेको छ ।
समाचार एजेन्सी टाससँग पुटिनका प्रवक्ता दिमित्री पेसकोभले भनेका छन्, ‘एक राज्य प्रमुखको तर्फबाट यो अभिव्यक्ति अस्वीकार्य र अक्षम्य छ, जसको बमले विश्वका लाखौं मानिसहरुको ज्यान लिएको छ ।’
