२६ जेष्ठ ,काठमाण्डौ । प्रतिनिधि सभा सदस्य कृष्णबहादुर राईले काठमाण्डौको फोहर व्यवस्थापन गर्ने जिम्मेवारी सत्तारूढ गठबन्धनको भएको बताएका छन ।
आज बिहीवारको प्रतिनिधि सभा बैठकमा बोल्दै सदस्य राईले काठमाण्डौको फोहोर व्यवस्थापनको जिम्मेवारी प्रधानमन्त्रीको मात्रै नभइ सत्तारूढ गठबन्धनको पनि भएको बताएका हून ।
उनले फोहोरमैला व्यवस्थापनको काममा जिम्मेवारीपूर्वक भूमिका निर्वाह गर्न गठबन्धनका शीर्ष नेताहरूको ध्यानाकर्षण पनि गराए ।
उनले भने, ‘काठमाण्डौको फोहर व्यवस्थापन गर्ने जिम्मेवारी गठबन्धनको हो । मैले मन्त्रालय र प्रधानमन्त्रीको मात्रै ध्यानाकर्षण गरिरहेको छैन । गठबन्धन सञ्चालन गर्ने नेतृत्वमा रहनुभएका जिम्मेवार व्यक्तिहरूलाई पनि यो जिम्मेवारी छ । तपाईँहरूले अविलम्ब फोहोरमैला व्यवस्थापन गर्नका लागि जिम्मेवारीपूर्वक भूमिका निर्वाह गर्न सक्नुपर्छ भन्ने कुरालाई म ध्यानाकर्षण गराउन चाहन्छु ।’
सांसद राईले फोहरको व्यवस्थापनका लागि काठमाण्डौ महानगरपालिकाका मेयरलाई उपमेयरको साथ हुने उल्लेख गर्दै संयमताका साथ अघि बढ्न मेयरलाई आग्रह गरे ।
