१८ असार,अछाम ।
अछामको पञ्चदेवल विनायक नगरपालिका ४ का विनोद शाहीको हत्या प्रकरणमा सो नगरपालिकाकी मेयर अम्बिका चलाउनेसहित ७ जना पक्राउ परेका छन् ।प्रहरीले मेयर चलाउने र नेत्र शाहीलाई शनिबार पक्राउ गरेको हो । यसअघि यो प्रकरणमा प्रहरीले पाँच जनालाई पक्राउ गरेको थियो ।गएको २१ जेठमा विनोद शाही मृत फेला परेका थिए । उनका आफन्तले मेयर चलाउनेलगायतविरुद्ध उजुरी दिएका थिए । पक्राउ परेकी मेयर चलाउने नेपाली कांग्रेस सुदूरपश्चिमकी महामन्त्रीसमेत हुन् । शाहीको शव २१ जेठमा फेला परेको थियो । नेकपा एमालेनिकट शाहीलाई नेपाली कांग्रेसका कार्यकर्ताले हत्या गरेको आरोप लगाउँदै घटनाको छानबिन नभएसम्म परिवारले शव उठाउन मानेका थिएनन् ।१७ जेठको रातिदेखि बेपत्ता रहेका विनोदको शव घरनजिकैको कुच्ची जङ्गलको खोँचमा भेटिएको थियो । २६ जेठमा १३ जनामाथि प्रहरी किटानी जाहेरी लिन प्रहरी तयार भएपछि परिवारले शव बुझेका थिए ।घटनाको अनुसन्धानका लागि प्रहरीको केन्द्रीय अनुसन्धान ब्युरो ९सीआईबी० को टोली खटिएको थियो । सीआईबीका प्रहरी नायब उपरीक्षक डीएसपी मनोहर भट्टको टोली अछाम पुगेर पनि अनुसन्धान गरेको थियो ।सीआईबीबाहेक घटनाको थप अनुसन्धान गर्न सुदूरपश्चिम प्रदेशस्थित सङ्घीय प्रहरी इकाई महेन्द्रनगरका प्रमुख प्रहरी वरिष्ठ उपरीक्षक एसएसपी जनकराज पाण्डे नेतृत्वको टोलीले पनि अनुसन्धान गरेको थियो ।शाही मृत्यु प्रकरणले राजनीतिक रूप लिन थालेपछि घटना गिजोलिने भन्दै प्रहरी प्रधान कार्यालयले सीआईबीको टोली खटाएको थियो ।
