२५ कात्तिक, विराटनगर ।
आसन्न निर्वाचनको मिति नजिकिदै गईरहेका बेला अन्य पार्टीका शीर्ष नेताझै नेकपा एमालेका अध्यक्ष केपी शर्मा ओली पनि चुनावी सभामार्फत चुनावी प्रचार गर्दै आएका छन् । चुनावी प्रचारकै क्रममा सुनसरीको धरान पुगेका ओलीको एउटा अभिब्यक्तिप्रति भने धरान उपमहानगरपालिकाका मेयर हर्क साम्पाङ राई आक्रोशित बनेका छन् ।
ओलीले कोशीको पानी धरान ल्याइने बताउँदै स्थानीय चुनावमा मत हाल्ने बेलामा आँखा नदेखेको भन्दै मेयर राईप्रति कटाक्ष गरेपछि मेयर राईले ओलीलाई हाउडेको संज्ञा दिएका छन् । सामाजिक संजालमा निक्कै सक्रिय मेयर हर्कले ओलीको सोही अभिब्यक्तिको समाचारसहितको भिडियो लिङ सेयर गर्दै लेखेका छन्, ग्यासको पाइप घर घरमा पुराएर पानी जहाजमा नेपालीलाई शयर गराउनेले कोशीको पानी ल्याउने गफ दिएछ !
म ल्याउँछु पानी कोशीको ! धेरै चुनौती नदिंदा हुन्छ हाउडेले ! ओलीले सम्बोधनमा कोशीको पानी पम्पिङ गरेर धरान ल्याउने बताएका थिए । ओलीले भने, ‘यहाँका मेयरलाई खानेपानी ले, खानेपानी ले भनेर कतिवटा घैला बोकुन विचरा?
कसको घरमा खानेपानी पु¥याउने?’ उनले धरानमा खानेपानी ल्याउन राष्ट्रिय बजेट र नेकपा एमालेको सरकार चाहिने बताए। ‘कोशीबाट पम्पिङ गरेर पानी ल्याएर एमालेले धरानवासीलाई खुवाउँछ, तपाईंहरू ढुक्क हुनुस्,’ ओलीले भने, ‘नगरको बजेटले त्यो आयोजना हुन्छ त? हुँदैन।
तर म केही भन्दिनँ, छान्ने बेला आँखा देख्नुभएन।’ उनले मंसिर ४ पछि आयोजना सुरू गरेर काम गर्ने पनि बताएका थिए। ‘त्यत्रो कोशी त्यहाँबाट बग्छ धरान काकाकुल हुने कसरी मिल्छ?’ ओलीले भने। धरानमा पर्याप्त पानी ल्याइने उनले बताए। मेयर हर्क भने मेयरमा निर्वाचित भएसँगै धरानमा खानेपानीको व्यवस्थापनमा जुट्दै आएका छन् ।
उनले जनश्रमदानबाटै धरानका केही स्थानीय खोलाबाट पानी ल्याइसकेका छन् । हर्कले आफ्नो चुनावी एजेण्डा नै धरानमा खानेपानीको सहज आपुर्ति गर्ने रहेको थियो । उनले पनि कोशीको पानी धराने जनतालाई पिउने व्यवस्थापन गर्ने बताउदै आएका छन् ।
तर यसका लागि आवश्यक खाका भने उनले कोरेका छैनन् । स्वतन्त्रबाट मेयरमा निर्वाचन हर्कले कार्यपालिका बैठकमा पनि सदस्यहरुबाट आशातित सहयोग पाउन सकेका छैनन् । पछिल्लो समय मात्रै दुई पटक कार्यपालिकाको बैठक स्थगित भईसकेको छ ।
