१६ मंसिर,एजेन्सी ।
कतारमा जारी फिफा विश्वकप फुटबल अन्तर्गत आज समूह चरणको अन्तिम चार खेल हुँदैछ । आज समूह जी र एचका दुई–दुई खेल हुनेछन् । समूह एचमा रहेको पोर्चुगल र दक्षिण कोरिया तथा घाना र उरुग्वे बीचको खेल राति पौने ९ बजे सुरु हुनेछ । यस्तै समूह जी मा रहेको ब्राजिल र क्यामरुन तथा स्वीजरल्याण्ड र सर्वियाबीचको खेल मध्यराति पौने १ बजे सुरु हुनेछ ।
आजको खेलपछि अन्तिम १६ अर्थात प्रिक्वाटरफाइनलमा पुग्ने सबै १६ टोलीको टुंगो लाग्नेछ । अहिलेसम्म १४ टोलीले अन्तिम १६ मा स्थान बनाइसकेका छन् । समूह एदेखि समूह ईसम्मका विजेता र उपविजेताको छिनोफानो भइसकेको छ । यस्तै समूह जी बाट ब्राजिल तथा समूह एचबाट पोर्चुगलले पनि अन्तिम १६ मा स्थान पक्का गरिसकेका छन् ।
अब आजको खेलपछि अन्तिम दुई टोलीले नकआउट चरणमा स्थान बनाउनेछन् र अन्तिम १६ को समीकरण पनि पूरा हुनेछ । अहिलेसम्म सबै महादेशबाट अन्तिम १६ मा प्रतिनिधित्व भएको छ । जसमा युरोपबाट सबैभन्दा धेरै ७ टिम छन् । यस्तै अफ्रिकाबाट मोरक्को र सेनेगल, दक्षिण अमेरिकाबाट ब्राजिल र अर्जेन्टिना, एसियाबाट अष्ट्रेलिया र जापान अनि उत्तर अमेरिकाबाट अमेरिकाले अन्तिम १६ मा स्थान बनाइसकेका छन् ।
पोर्चुगल लगातार दुई खेल जित्दै अन्तिम १६ मा पुगिसकेको छ भने बाँकी तीन टिम एक स्थानका लागि प्रतिस्पर्धामा छन् । दक्षिण कोरिया, उरुग्वे र घाना मध्ये एक टिम मात्र अन्तिम १६ मा पुग्नेछन् । पोर्चुगलले यसअघि घाना र उरुग्वेलाई हराएर अन्तिम १६ मा स्थान पक्का गरिसकेको छ । पोर्चुगल ६ अंकसहित समूहको शीर्ष स्थानमा छ ।
एक खेलमा जित निकालेको घाना ३ अंकसहित दोस्रो स्थानमा छ भने उरुग्वे र साउथ कोरियाको समान १ अंक छ । पोर्चुगलले अन्तिम १६ मा स्थान बनाइसकेकोले अब उसको नजर समूह विजेता बन्नेमा हुनेछ । दक्षिण कोरिया विरुद्ध बराबरी खेलेमा पनि पोर्चुगल समूह विजेता बन्नेछ । यदी उरुग्वे र घानाले बराबरी खेलेमा कोरियासँग पराजित भए पनि पोर्चुगल समूह विजेता बन्नेछ ।
कोरियाको लागि भने नकआउट चरणमा पुग्नका लागि पोर्चुगललाई हराएर मात्र पुग्दैन अर्को खेलमा घानाले उरुग्वेसँग बराबरी खेल्नुपर्नेछ वा उरुग्वेले पनि घानालाई हराउनुपर्नेछ । यदी कोरिया र उरुग्वेले आफ्नो खेल जिते दुवैको समान ४ अंक हुनेछ र यस्तोमा गोलअन्तर निर्णायक हुनेछ । यसअघि कोरिया र उरुग्वेले गोलरहित बराबरी खेलेका थिए ।
उरुग्वेको हकमा भने घानालाई पराजित गर्नुपर्नेछ भने कोरिया पोर्चुगलसँग पराजित हुनुपर्नेछ । यस्तो नतिजा आएमा उरुग्वे समूह उपविजेता बन्दै अन्तिम १६ मा पुग्नेछ । घाना भने उरुग्वेलाई पराजित गरे सिधै अन्तिम १६ मा पुग्नेछ । उरुग्वेसँग पराजित भएमा भने घाना बाहिरिनेछ । यस्तै उरुग्वेसँग बराबरी खेलेमा पनि घानाको अघि बढ्ने सम्भावना कायम रहनेछ । यसका लागि अर्को खेलको नतिजा पनि आफू अनुकुल आउनुपर्नेछ ।
