८ माघ, काठमाण्डौ ।
उपप्रधान तथा गृहमन्त्री रवि लामिछानेले निर्देशन दिएपनि प्रतिनिधिसभा सदस्य लक्ष्मी महतो कोइरीलाई पक्राउ गर्न आलटाल गर्दै आएको नेपाल प्रहरीले बढ्दो दबाबपछि उनलाई पक्राउ गर्न देशभर सर्कुलर जारी गरिएको छ । गृह मन्त्रालयले कोइरीलाई पक्राउ गर्न प्रहरी प्रधान कार्यालयलाई लिखित रूपमा पत्राचार गरेको छ ।
गृह मन्त्रालयबाट मौखिक र लिखित निर्देशन आएको प्रहरी प्रवक्ता (डीआईजी) टेक प्रसाद राईले बताएका छन् । उनले देशभर सर्कुलर गरेको बताएका छन् । नेकपा (एमाले)का सांसद कोइरी महोत्तरी क्षेत्र नम्बर–१ बाट निर्वाचित भएका हुन् । उनलाई पक्राउ गर्नेबारे प्रहरी प्रधान कार्यालय र गृह मन्त्रालयको बीचमा विवाद देखिएको छ ।
माघ ६ मा गृह मन्त्रालयले कोइरीलाई पक्राउ नगरेकोमा विज्ञप्ति नै निकालेर असन्तुष्टि जनाएको थियो । यसअघि संसदमा उपस्थित भएको समाचार बाहिरिएसँगै गृहमन्त्री लामिछानेले उनलाई तत्काल पक्राउ गर्न मौखिक निर्देशन दिएका थिए । सांसद कोइरी महोत्तरीको गौशाला नगरपालिका–२ का स्थानीय हुन् ।
कोइरीलाई पक्राउ गर्नेबारे गृह मन्त्रालयले विज्ञप्ति जारी गरेर भनेको थियो–‘उपप्रधानमन्त्रीज्यूबाट पटक पटक प्रहरीलाई मौखिक निर्देशन भएकोमा हालसम्म पक्राउ नपरेको प्रति मन्त्रालयको गम्भीर ध्यानाकर्षण भएको छ ।’ राष्ट्रसेवक कर्मचारी हत्या अभियोगमा उच्च अदालत जनकपुरले कोइरीलाई थुनामा राखेर मुद्दाको पुर्पक्ष गर्न आदेश दिएको छ ।
२०७७ मंसिर १९ मा जनकपुर उच्च अदालतले जारी गरेको ‘वारेन्ट’का कारण उनी प्रहरीको ‘खोजी सूची’मा छन् । अदालतबाट जारी पक्राउ पुर्जी प्रहरीसँग छ । प्रधान कार्यालयले सो पुर्जी अहिले देशभरका प्रहरी युनिटहरूमा पठाएको छ । सांसद कोइरीमाथि २०७२ को मधेस आन्दोलनमा सशस्त्र प्रहरीका असई थमन विकलाई लखेटेर हत्या गरेको आरोप छ ।
उनीविरुद्ध प्रेम बहादुर विकले जिल्ला प्रहरी कार्यालय महोत्तरीमा कर्तव्य ज्यान मुद्दाको जाहेरी दिएका थिए । सो मुद्दामा तारेख गुजारेर उनी फरार भएका हुन् । लक्ष्मी महतोको अस्थायी बसोबास भक्तपुरको दुवाकोटमा छ । उपत्यका प्रहरी कार्यालयले उनी बस्ने घरमा निगरानी बढाउन प्रहरी परिचालन गरेको छ ।
घरमा निगरानी बढाएपछि सांसद कोइरी भने भातरतिर लागेको आशंका गरिएको छ । मंसिर ४ मा सम्पन्न प्रतिनिधिसभा निर्वाचनमा महतोले नेकपा (माओवादी केन्द्र)का उप–महासचिव गिरिराजमणि पोखरेललाई हराएका थिए । चुनावअघि जसपा छाडेर एमाले प्रवेश गरेरका थिए ।
प्रहरीको फरार सूचीका कोइरीले वारेसमार्फत उम्मेदवारी दिए, विजयी भएपछि प्रमाणपत्र लिन पनि वारेस नै पठाए । संसदको सपथ लिदा, प्रधानमन्त्री प्रचण्डलाई विश्वासको मत दिदा, सभामुख चयनका बेला भने उनी सदनमा उपस्थित भएका थिए । सो बेला कांग्रेसका सांसदहरुले फरार अभियुक्त संसदमै हुँदा पनि प्रहरीले किन पक्राउ नगरेको भन्दै गृहमन्त्री रवि लामिछानेसंग जवाफसमेत मागेका थिए ।
