१० वैशाख, काडमाण्डौ ।
तीनवटा क्षेत्रमा भएको उपनिर्वाचनको मतगणना आजै थालिने भएको छ । बारा–२, चितवन–२ र तनहुँ–१ मा उपनिर्वाचनको आज मतदान भएको छ । मतदान सकिएसँगै आजैबाट मतगणना सुरु हुने निर्वाचन आयोगका सहायक प्रवक्ता सूर्यप्रसाद अर्यालले जानकारी दिएका छन् । आयोगले निर्वाचनको परिणाम सार्वजनिक गर्नमा पनि ढिलाइ नगर्ने उनको भनाइ छ ।
यसैबीच चितवन २ मा राष्ट्रिय स्वतन्त्र पार्टीका उम्मेदवार रवि लामिछानेले विभिन्न मतदानस्थलमा हुलहुज्जत गर्दै मतदातालाई प्रभावित पारेको भन्दै नेपाली कांग्रेसले निर्वाचन आयोगसमक्ष उजुरी दिएको छ । उक्त घटनामा प्रशासनले पनि एकपक्षीय ढंगबाट मतदाता र प्रतिनिधिमाथि लाठी चार्ज गरेर भयभित बनाएको आरोपसहित चितवनका सीडीओमाथि पनि कारबाहीको माग गरिएको छ ।
गठबन्धनबाट कांग्रेस उम्मेदवार जीतनारायण श्रेष्ठका निर्वाचन प्रतिनिधि ध्रुवराज पोखरेलले आयोगसमक्ष उजुरी दिएका हुन् । मतदान प्रक्रिया चलिरहेको अवस्थामा सामाजिक सञ्जाल र अनलाइन मिडियाबाट राष्ट्रिय स्वतन्त्र पार्टीका उम्मेदवार रवि लामिछानेले मत मागेको अडिओ÷भिडिओ सार्वजनिक भएको, आचारसंहिताविपरीत विभिन्न मतदानस्थलमा हुलहुज्जत गर्ने÷गराउने गरी मतदातालाई प्रभावित पारेको उजुरीमा उल्लेख छ ।
नयाँ किरण मावि भोजाड मतदानस्थलमा असहज परिस्थितिपछि बसेको सर्वदलीय बैठकमा समेत रास्वपा र रास्वपाका उम्मेदवारले आचारसंहिताको उल्लंघन गरेको स्वीकार गरेकाले कारबाहीको सिफारिस गर्ने निर्णय भएको उजुरीमा स्मरण गराइएको छ ।
नेपाली कांग्रेस र नेकपा एमालेका स्थानीय नेताहरुले भरतपुर १२ को मोहन माविलगायतका ठाउँमा रवि लामिछानेका समर्थकहरुले अराजकता प्रदर्शन गरेका कारण झडप भएको दाबी गरेका छन् । रास्वपाका उम्मेदवार रवि लामिछानेको समूह निर्वाचन आचारसंहिताविपरीत घण्टी बजाउँदै र नारा लगाउँदै मतदान केन्द्रमा प्रवेश गरेपछि विवाद भएको कांग्रेस उम्मेदवार जितनारायण श्रेष्ठले बताएका छन् ।
उनले रविका समर्थकहरुले मतदान केन्द्रमा नाराबाजी गरेर मतदातालाई तर्साएको बताएका छन् । रवि लामिछाने, भरतपुर १२ को मोहन माविबाट नयाँ किरण मावि भोजाड जाँदा उनका समर्थकहरूले घण्टी बजार नारावाजी गरेका थिए ।
यसमा रास्वपाले आचारसंहिता उल्लंघन गरेकोमा क्षमायाचना गरेको छ ।मतदानस्थलमा घण्टी बजाउँदै नाराबाजी गरेपछि झडप भएको थियो । झडपका कारण स्थगित भएको मतदान सर्वदलीय सहमतिसँगै सुचारु भएको थियो । दलहरूबीच ४ बुँदे सहमति भएको छ ।
चितवन २ मा सम्पन्न उपनिर्वाचनमा ५९ प्रतिशत मतदान भएको छ । प्रहरीले ५ बजेसम्म संकलन गरेको तथ्यांकअनुसार ७३ हजार ४ सय ५६ अर्थात् ५८.९ प्रतिशत मत खसेको हो । केही मतदान केन्द्रहरुमा लाइनमा बसेकाहरुले मतदान गरिरहेका छन् ।
