२४ वैशाख,एजेन्सी ।
विश्वकै शक्ति राष्ट्र अमेरिकामा फेरि अर्काे एक गोलीकाण्ड मच्चिएको छ । अमेरिकाको टेक्सासमा एक आक्रमणकारीले गोली चलाएर आठ जनाको हत्या गरेको छ । यस पटक गोलीबारी सपिङ मलमा भएको थियो जहाँ मानिसहरू किनमेल गर्न आएका थिए। एलेन सिटीमा भएको यो घटनामा एक बालकको पनि मृत्यु भएको छ ।
प्रत्यक्षदर्शीका अनुसार आक्रमणकारीले अचानक अन्धाधुन्ध गोली चलाउन थाले । आक्रमणकारी पनि मारिएको प्रहरीले जनाएको छ । यो घटना उनले एक्लैले गरेको अनुमान गरिएको छ । हाल अस्पतालमा सात जनाको उपचार भइरहेको छ, जसमध्ये तीन महिलाको अवस्था चिन्ताजनक रहेको छ ।
एलेन सिटी फायर चीफ जोनाथन बॉयडले आक्रमणकारी सहित केही व्यक्तिको घटनास्थलमै मृत्यु भएको बताएको सीएनएनले उल्लेख गरेको छ । जबकि अस्पतालमा दुई जनाको मृत्यु भएको छ । एलेनका प्रहरी प्रमुख ब्रायन हार्वेले गोली चलेको आवाज सुनेपछि एक प्रहरी अधिकारी घटनास्थलमा पुगेर आक्रमणकारीलाई घेरेको बताएका छन् ।
टेक्सासका गभर्नर ग्रेग एबोटले यो घटनालाई शब्दमा वर्णन गर्न नसकिने बताएका छन् । उनले यसलाई ‘अवर्णनीय त्रासदी’ भनेका छन् । उनले स्थानीय तहलाई आवश्यक सहयोग गर्न प्रहरी तयार रहेको बताएका छन् । प्रहरीले मलमा आएका मानिसहरूलाई घटनाको समयमा बनाइएका भिडियोहरू बारे सोधेको छ। त्यस्ता व्यक्तिहरूलाई एफबीआईलाई सम्पर्क गर्न भनिएको छ।
केही प्रत्यक्षदर्शीहरूले बन्दुकधारीले कालो कपडा र कम्ब्याक्ट गियर लगाएको बताएका छन्। घटनास्थलबाट आएको भिडियो क्लिपमा पार्किङस्थलमा एकपछि अर्को गरी मानिसलाई कसरी निशाना बनाइएको थियो भन्ने देख्न सकिन्छ । एक प्रत्यक्षदर्शी, फन्टेन पिटनले किनमेल गर्दा हेडफोनबाट बन्दुकको आवाज सुनेको बताएका छन् ।जब मानिसहरूलाई मलबाट बाहिर निस्कन दिइयो, बाहिर शव मात्रै थियो।
गन वाइलेन्स आर्काइभका अनुसार यस वर्ष अमेरिकामा अहिलेसम्म कम्तीमा १९८ सामूहिक गोलीकाण्ड भएका छन्। यस हप्ताको सुरुमा, टेक्सासमा प्रहरीले एक व्यक्तिलाई पक्राउ गरेको थियो। यी व्यक्तिले नौ वर्षीय बालकसहित पाँच छिमेकीको गोली हानी हत्या गरेका थिए । गोलीकाण्डबाट सयौं नागरिकले ज्यान गुमाईसक्दा पनि अमेरिकी सरकारले पूर्ण नियन्त्रण गर्ने बन्दुक कानुन ल्याउन सकेको छैन् ।
