२८ वैशाख, एजेन्सी ।
युइएफए च्याम्पियन्स लिग अन्तरगत सेमिफाइनलको पहिलो लेगको मिलान डर्वीमा इन्टर मिलानले एसी मिलानलाई पराजित गरेको छ । एसी मिलानलाई २–० ले पराजित गर्दै इन्टरले फाइनल पुग्ने सम्भावना बलियो बनाएको हो । इन्टरको जितमा इडेन जेको र हेनरिक मिखटरयानले गोल गरे ।
मिलानोमा बुधबार राति भएको खेलमा इन्टरले खेल शुरु भएको ११ मिनेटभित्रै दुई गोल गर्दै त्यही गोललाई जोगाएर जित दर्ता गर्न सफल भयो । खेलको आठौं मिनेटमा जेकोले गोल गर्दै इन्टरलाई १–० को अग्रता दिलाए । उनले हकान चलहानोग्लुको पासमा गोल गर्न सफल भएका थिए ।
११औं मिनेटमा हेनरिक मिखटरयानले गोल गर्दै इन्टरलाई २–० को अग्रता दिलाए । उनले फेडरिको डिमार्काेको पासलाई सदुपयोग गरेका थिए । ३१औं मिनेटमा इन्टरले पेनाल्टी पाएपनि भिएआरबाट पेनाल्टीले मान्यता पाएन । पहिलो हाफको शुरुमै पछि परेको मिलानले बल पोसेसन राख्दै इन्टरलाई दवावमा राखेपनि गोल गर्न नसक्दा पराजित हुन पुग्यो ।
इन्ज्युरी समयमा तोमासो पोवेगाको प्रहार सिधै इन्टरका गोलरक्षक आन्द्रे ओनानाको हातमा पार्दा मिलान गोल अन्तर कम गर्नबाट चुक्यो । मिलानका ब्राहिम डिया, जुनियर मेसिएस र ओलिभर जिरुडले गोलका केही अवसर खेर फालेका थिए ।
यस जितसँगै इन्टरले मिलानविरुद्ध पछिल्लो तीन खेलमा जित निकाल्न सफल भयो । यस जितसँगै इन्टरको फाइनल पुग्ने सम्भावना बलियो बनेको छ । अब यी दुईबिचको दोस्रो लेगको खेल मे १७ तारिखमा इन्टर मिलानको घरेलु मैदानमा हुनेछ ।
इन्टरलाई यही नतिजा फाइनल पुग्न पर्याप्त हुनेछ । मिलानलाई फाइनल पुग्न कम्तीमा पनि ३–० को जितको आवश्यकता हुनेछ । यसअघि बुधबार बिहान भएको पहिलो सेमिफाईनलको पहिलो लेगमा रियाल मड्रिड र म्यानचेस्टर सिटीले१–१ को बराबरी खेलेका थिए । यी दुईबिचको दोस्रो लेगको खेल मे १८ तारिखमा सिटीको मैदानमा हुनेछ ।
