३१ वैशाख, काठमाण्डौ ।
परराष्ट्रमन्त्री नारायणप्रकाश साउदले स्वस्थ हिन्द महासागर एवं यस क्षेत्रको शान्ति, समृद्ध र लचिलो भविष्यका लागि सबै मुलुक मिलेर अघि बढ्नुपर्ने बताएका छन् । छैटौँ हिन्द महासागर सम्मेलनलाई शनिबार बंगलादेशको ढाकामा सम्बोधन गर्दै परराष्ट्रमन्त्रीले हिमाल र महासागरबीचको प्राकृतिक सम्बन्ध सुदृढ हुनुपर्नेमा जोड दिएका छन ।
हिन्द प्रशान्त क्षेत्रमा वास्तविक, सुदृढ र जिम्मेवार रूपमा सबै मुलुकले आपसी सहकार्य गर्नुपर्ने पनि उनको भनाइ छ । परराष्ट्रमन्त्री साउदले हिन्द महासागरको रणनीतिक, आर्थिक र वातावरणीय महत्वमा जोड दिएका छन । उनले नेपालजस्ता भूपरिवेष्टित मुलुकका लागि अन्तर्राष्ट्रिय बजारको प्रवेशद्वारका रूपमा हिन्द महासागर रहेको पनि उनले उल्लेख गरे ।
साउदले हिमाल, समुद्र, साथै तटीय र दुर्गम प्रदेशको जनजीवनमा जलवायु परिवर्तनको असरलाई सबैले मिलेर सम्बोधन गर्नुपर्ने पनि बताए । मन्त्री साउदले ढाकामा शनिबार जापानको विदेश मामिला हेर्ने उपमन्त्री ताकागी केई, सिंगापुरको प्रधानमन्त्री कार्यालय, विदेश मामिलासम्बन्धी मन्त्री डा. मोहम्मद मलिकी बिन उस्मान, अमेरिकी उपसहायक मन्त्री अफरिन अख्तरलगायतसँग साइडलाइन वार्ता गरेको नेपाली दूतावासले जनाएको छ ।
यसअघि शुक्रबार उनले भारतीय विदेशमन्त्री एस जयशंकरसंग साइडलाइन वार्ता गरेका थिए । जयशंकरले ट्विटरमार्फत साउदसँग पहिलो भेट फलदायी भएको र नयाँ जिम्मेवारीका लागि आफूले बधाई दिएको उल्लेख गरेका छन् ।
‘हामीबीच निरन्तर बढिरहेको साझेदारीलाई अगाडि बढाउन चाल्नुपर्ने कदमबारे छलफल भयो,’ जयशंकरले भनेका छन्, ’ऊर्जा, कनेक्टिभिटी र जनता–जनताबीचको हाम्रो स्थायी सम्बन्धबारे पनि कुराकानी भयो ।’ परराष्ट्रमन्त्री साउदले भारतीय समकक्षीलाई भेटेर खुसी लागेको भन्दै द्विपक्षीय सहयोगका लागि मिलेर काम गर्न चाहेको उल्लेख गरेका छन् ।
भेटपछि दुई देशबीचको सीमा विवादका विषय भने उनीहरुले उल्लेख गरेका छैनन् । नेपालका लिपु लेक, कालापानी र लिम्पियाधुरा अहिले पनि भारतले कब्जा गरिरहेको छ । तर दुई देशका उच्च अधिकारी बीचको भेटवार्तामा पनि यो विषयले प्राथमिकता पाउन सकेको छैन् ।
