१६ असार, काठमाण्डौ ।
काठमाडौं महानगरपालिकाका मेयर बालेन्द्र शाहले नेपालका नेताहरूलाई फेरि ’भारतको गुलाम’को संज्ञा दिएका छन् । असार १५ मा फोटो सेसन गर्दै खेतमा पुग्ने नेताहरूप्रति कटाक्ष गर्दै उनले यस्तो टिप्पणी गरेका हुन् । ’नेताज्यूहरूले यसरी नै, वर्षभरि नै धान रोपिदिनुभयो भने, तपाईंहरू भारतको गुलाम हुनु पर्दैन,’ उनले भनेका छन् ।
२०औँ धान दिवसको अवसरमा शुक्रबार विभिन्न दलका नेताहरू औपचारिक कार्यक्रमका साथ धान दिवस मनाउन खेतमा पुगेका थिए । पत्नी राधिका शाक्यसहित नेकपा एमालेका अध्यक्ष केपी शर्मा ओली, रास्वपा अध्यक्ष रवि लामिछाने र रास्वपाका अन्य सांसदहरू, कृषिमन्त्री वेदुराम भुसाललगायत नेताहरू असार १५ मनाउन किसानका खेतमा गएका थिए ।
मुलुकको कूल गार्हस्थ्य उत्पादन (जीडीपी) मा धानको योगदान ४ प्रतिशत रहेको तथ्यांकहरूले देखाउँछन् । समग्र कृषि क्षेत्रको कुल गार्हस्थ्य उत्पादन (एजीडीपी) मा भने धानको योगदान १३ प्रतिशत छ । जीडीपीमा धानको योगदान घट्दै गएको देखिन्छ । आर्थिक वर्ष २०७८÷७९ मा चामल मात्रै ४७ अर्ब ५७ करोड रुपैयाँको आयात भएको थियो ।
प्रत्येक वर्ष राष्ट्रिय धान दिवस मनाउने सरकार, उसका मन्त्री तथा प्रतिनिधि, विभिन्न दलका नेता तथा सांसदहरुले यी तथ्यांकहरू सोही दिन धान रोपेर फर्केदेखि नै विर्सिने गरेका छन् । कृषि र पशुजन्य आयात कसरी घटाउने भन्ने विषयमा संसदमा छलफल हुँदैन । संसदीय समितिहरूले चासो राख्दैनन् । यसैलाई लक्षित गर्दै काठमाडौका मेयर बालेनले कटाक्ष गरेका हुन् ।
