२९ असार, एजेन्सी ।
गत महिना रुस विरुद्ध असफल विद्रोह सुरु गर्ने निजी सेना वाग्नर समूहका प्रमुख येभगेनी प्रिगोजिन कहाँ छन् भन्ने विषयमा विश्वकै चासो बढिरहेको छ । रुसमा विद्रोहपछि पुटिनसँग भएको सहमति, त्यसपछि बेलारुस निर्वासन र बेलारुसबाट फेरि रुस फिर्ता भईसकेको र पुटिनसँग समेत भेट भएको बताइएपनि बाग्नर प्रमुखका विषयमा अमेरिकाले नयाँ खुलासा गरेको छ ।
एक पूर्व अमेरिकी अधिकारीले प्रिगोजिनको या त मृत्यु भईसकेको या त जेलमा रहेको वा लुकेर बसेको बताएका छन् । सेवानिवृत्त अमेरिकी जनरल रोबर्ट अब्राम्सका अनुसार क्रेमलिनले हालै पुटिन र प्रिगोजिनबीच जुन २९ मा भएको भेटघाटको पुष्टि गरेको विषय पनि गलत हो। एक अमेरिकी टेलिभिजनमा उनले यस्तो दाबी गरेका हुन् ।
सो क्रममा उनले नेटो शिखर सम्मेलन र युक्रेनको द्वन्द्व जस्ता विभिन्न मुद्दाहरूमा बोलेका थिए। यस क्रममा उनले वाग्नर समूहको विद्रोहको पनि वर्णन गरेका छन् । अब्राम्सले भनेका छन्, ’मलाई विश्वास छ कि हामीले प्रिगोजिनलाई सार्वजनिक रूपमा फेरि कहिल्यै देख्ने छैनौं।’ उनले थप भनेका छन्, “मलाई लाग्छ कि उनी लुकेर बसेका छन्, वा जेल पठाइएका छन् वा मारिएका छन्।“
प्रिगोजिन जिउँदै रहेको सम्भावनाबारे उनले भनेका छन्, ‘मलाई लाग्दैन उहाँ जिउँदै हुनुहुन्छ र यदि हुनुहुन्छ भने कतै जेलमा हुनुहुन्छ । हालै रुसी राष्ट्रपतिको कार्यालयले क्रेमलिनको तर्फबाट विद्रोहको केही दिनपछि पुटिन र प्रिगोजिनबीच २९ जुनमा भेट भएको बताएको थियो । रुसी राष्ट्रपति पुटिनका प्रवक्ता दिमित्री पेस्कोभले यसको पुष्टि गरेका छन् ।
यो भेटलाई उल्लेख गर्दै अब्रामले भने, ’यदि हामी वास्तवमा यो भेटको कुनै प्रमाण देख्न सक्छौं भने म छक्क पर्नेछु, जसले यी दुईको भेट भएको हो भन्ने देखाउनेछ। मलाई लाग्छ बैठकको वार्ता झुटो हो। दिमित्री पेस्कोभले भने राष्ट्रपति पुटिनले वाग्नरको सेनाका कमाण्डर सहित प्रिगोजिनसँग भेट गरेको बताएका थिए।
यस बैठकमा जम्मा ३५ जना सहभागी थिए । पेस्कोभका अनुसार सो क्रममा राष्ट्रपतिले युक्रेनको युद्धमा वाग्नर आर्मीको भूमिकाको प्रशंसा गरेका थिए । उनले यो पनि दावी गरेका छन्, कि पुटिनले वाग्नर कमाण्डरहरूको तर्क सुने र उनीहरूलाई एक पटक फेरि जागिरको प्रस्ताव गरेका छन् ।
प्रिगोजिनले रक्षा मन्त्री सर्गेई शोइगु र जनरल स्टाफ भ्यालेरी गेरासिमोभलाई हटाउन आह्वान गरेपनि अहिलेसम्म दुवै पदमा छन्। हालै यो पनि रिपोर्ट सार्वजनिक भएको थियो कि पुटिनले प्रिगोजिनलाई युक्रेनी राष्ट्रपति जेलेन्स्कीको हत्या गर्ने जिम्मेवारी दिएका थिए।
