२ साउन, एजेन्सी ।
युक्रेनमा आक्रमण जारी राखेको रुसले ब्ल्याक सी हुँदै अन्न निर्यात गर्ने उसंगको सम्झौता समाप्त भएको घोषणा गरेको छ । गएरातिदेखि समाप्त हुने सम्झौतालाई क्रेमलिनले हिजो नै म्याद समाप्त भएको बताएको हो । आफूले अघि सारेका सर्तहरू पूरा भएमा पुनः सम्झौतामा फर्कनसक्ने पनि रुसले स्पष्ट गरेको छ ।
यो घोषणापछि रुसले टर्की, युक्रेन र संयुक्त राष्ट्र सङ्घलाई सम्झौताको म्यादबारे जानकारी पठाएको अन्तर्राष्ट्रिय सञ्चार माध्यमले जनाएका छन् । युक्रेनले ब्ल्याक सीबाट सुरक्षित रूपमा अन्न निर्यात गर्दै आएको थियो, तर सम्झौताबाट पछि हट्दै रुसले निर्यात गर्न नदिने निर्णय गरेको हो । रुसको यो निर्णयले विश्वलाई नै असर पार्न सक्छ ।
विश्वका नेताहरूले रुसको निर्णयले विश्वका गरिब देशहरूमा असर पर्ने भन्दै आलोचना गरेका छन् । संयुक्त राष्ट्रसङ्घ र टर्कीको मध्यस्थतामा भएको यो सम्झौता राम्ररी कार्यान्वयन नभएको आरोप लगाउँदै रुसले त्यसलाई पालना नगर्ने बताएको समाचार संस्था एएफपीले जनाएको छ । क्रेमलिनका प्रवक्ता दिमित्री पेस्कोभले रूसी पक्षसम्बन्धी सम्झौताका बुँदा पूरा हुने बित्तिकै त्यसमा फर्किन सक्ने बताएका छन् ।
अन्न सम्झौताबाट बाहिरिने रुसको घोषणालाई अमेरिकाले क्रुर निर्णयको संज्ञा दिएको छ । संयुक्त राष्ट्र सङ्घका लागि अमेरिकी राजदूत लिन्डा थोमस ग्रीनफिल्डले राष्ट्रसङ्घीय मुख्यालय न्युयोर्कमा मस्कोले मानवतालाई बन्धक बनाएको आरोप लगाएकीछन् । जर्मनीले सम्झौताको म्याद लम्ब्याउन रुससँग आग्रह गरेको छ ।
यसैबीच रुस र क्रिमियालाई जोड्ने पुलमा विस्फोटपछि सोमबार आपतकालीन अवस्था घोषणा गरिएको छ । आपतकालीन अवस्था घोषणा गरिएको पुलमा दुईजनाको मृत्यु भएको र एक बालिका घाइते भएको बताइएको छ । रुसको दक्षिणी क्षेत्र बेलगोरोडका गभर्नर व्याचेस्लाभ ग्लाडकोभले घटनामा मृत्यु हुनेमा एक दम्पती रहेका छन् ।
उनीहरूका छोरी भने घाइते छन् । क्रिमियालाई क्रास्नोडारसँग जोड्ने पुलले युक्रेनमा लडिरहेका रूसी सैनिकहरूको आपूर्ति–ढुवानीका लागि महत्वपूर्ण लिंकका रूपमा काम गर्छ । विस्फोटको विषयमा युक्रेनी पक्षबाट कुनै टिप्पणी आएको छैन ।
