२९ साउन,काठमाण्डौ ।
प्रहरीको केन्द्रीय अनुसन्धान ब्युरो (सीआईबी) को नक्कली डाक्टरविरुद्धको अपरेसनका क्रममा पक्राउ परेका सक्कली डाक्टर रिहा भएका छन् । नक्कली शैक्षिक प्रमाण पत्र भएको भन्दै ब्यूरोले पक्राउ परेका पिपरा गाउँपालिका –८, महोत्तरीका रञ्जिनकुमार यादवलाई पक्राउ गरेको थियो ।
तर उनी सक्कली भएको पाइएपछि रिहा भएका हुन् । नाम जुधेका कारण उनी पक्राउ परेको नेपाल मेडिकल काउन्सिलका रजिस्टार डा. कृष्ण प्रसाद अधिकारीले बताएका थिए । काउन्सिलले पक्राउ परेका व्यक्ति फरक भएको पत्र पठाएपछि सीआइबीले यादवलाई रिहा गरेको हो ।
यसबारे सीआइबीले आज विज्ञप्ति निकालेर जानकारी दिँदै छ । नक्कली शैक्षिक प्रमाण पत्र भएको भन्दै ब्यूरोले पक्राउ परेका पिपरा गाउँपालिका–८, महोत्तरीका रञ्जिनकुमार यादवको प्रमाण पत्रमा कैफियत नभएको पाइएको छ ।
ब्यूरोका अनुसार, उनको बुबाको नामबाहेक अरु सबै विवरण मेल खाएपछि उनलाई प्रहरीले नियन्त्रणमा लिएको थियो । डा. रञ्जितले जनकपुरमा पढेका हुन् । ब्युरोले नेपाली कांग्रेसका सांसद सुनिल शर्मा सहित ८ जनालाई नक्कली प्रमाणपत्र लिएको आरोपमा पक्राउ गरेको थियो ।
शर्मालाई जिल्ला अदालतले तारेखमा राखेर अनुसन्धान गर्न आदेश दिएपछि उनी रिहा भएका छन् । अब डा. यादव रिहा भएपछि ६ जना चिकित्सक सीआईबीको हिरासतमा छन् ।
सीआईबीको हिरासतमा शिक्षण अस्पतालमा कार्यरत डा. अमित चौधरी, डा. रामबाबु यादव, डा. एरिना शाह, ईशान बाल अस्पतालमा कार्यरत डा. श्रद्धा शिल्पकार, मोरङबाट पक्राउ गरिएका डा. मनित चौधरी र गोठाटारबाट पक्राउ परेकी डा. पुनम थापा छन् । सांसद सुनिल शर्माको पक्राउ र रिहाईबारे आज बस्ने प्रतिनिधिसभाको बैठकमा जानकारी गराइने कार्यसूची रहेको छ ।
