१६ असोज, एजेन्सी ।
चीनको हाङ्झाउमा एसियन गेम्स अन्र्तगत नेपाल क्रिकेटको महाशक्ति भारतसँग २३ रनको साँघुरो अन्तरले पराजित भयो । बलियो प्रतिस्पर्धीविरुद्ध नेपाली टिमले सजिलै आत्मसमर्पण गरेन । यसको विपरित नेपालले भारतविरुद्ध आफ्नो पावर हिटिङ क्षमता प्रस्तुत गरेको छ । खेलमा पराजित भए पनि नेपाली ब्याट्सम्यानले भारतीय ब्याट्सम्यानभन्दा बढी छक्का प्रहार गरेका छन् ।
हाङ्झाउको रंगशालामा बाउन्ड्री औसतभन्दा सानो छ । यही मैदानमा नेपालले मंगोलियाविरुद्धको म्याचमा सर्वाधिक छक्काको विश्वकिर्तिमान राखेको थियो । फितलो बलिङमाथि नेपाली ब्याट्सम्यानले प्रभूत्व देखाएको टिप्पणी पनि भए । तर, सशक्त प्रतिद्वन्द्वी भारतका बलरहरुमाथि पनि नेपालले पावर हिटिङमा कुनै कसर छोडेन ।
आजको खेलमा भारतीय ब्याट्सम्यानले भन्दा नेपालका ब्याट्सम्यानले धेरै छक्का प्रहार गरेका छन् । भारतले १२ वटा छक्का हानेकोमा त्यसलाई उछिन्दै नेपालले १४ वटा छक्का हानेको हो । भारतका ओपनर यसस्वि जैसवाल एक्लैले ७ छक्का हानेका थिए भने रिंकु सिंहले ४ छक्का हाने । बाँकी एक छक्का शिवम दुवेको नाममा रह्यो ।
२३ बलको सामना गरेका भारतीय कप्तान तथा ओपनिङ ब्याट्सम्यान रुतुराज गाइक्वाडले एउटा पनि छक्का हान्न सकेनन् । तिलक बर्मा र जितेश शर्मा सस्तैमा आउट भएका थिए । यता नेपालबाट भने ७ जना ब्याट्सम्यानले कम्तिमा एउटा छक्का प्रहार गरे । सबैभन्दा बढी दीपेन्द्रसिंह ऐरीले ४ छक्का हाने । १४ औं ओभरमा उनले शिवम दुवेलाई लगातार तीन छक्का प्रहार गरेका थिए ।
त्यस ओभरमा उनले २१ रन बटुृल्दै नेपालको आशा जगाएका थिए । तर, अर्को ओभरमा फेरि छक्का हान्न प्रयास गर्दा उनी आउट भए । ओपनर कुशल भुर्तेलले र आसिफ शेखले १–१ छक्का हानेका थिए । नेपालका लागि छक्काको खाता आसिफले खोले । उनले आभेस खानलाई डिप कभरतर्फ हानेको छक्का उत्कृष्ट थियो ।
सर्वाधिक छिटो सतकका विश्वकिर्तिमानी कुशल मल्लले दुई छक्का प्रहार गरे । सर्वाधिक छिटो अर्धसतकका किर्तिमानी ऐरीले आफ्नो दोस्रो बलमा नै शिवम दुवेविरुद्ध छक्का हानेका थिए । यस्तै, युवा ब्याट्सम्यान सन्दीप जोरा पनि छक्का हान्न पछि परेनन् । उनले अर्सदीप सिंहमाथि एकै ओभरमा २ छक्का प्रहार गरेका उनले जम्मा ३ छक्का हाने ।
यस्तै, तल्लो क्रममा सोमपाल कामीले एक र करण केसीले दुई छक्का प्रहार गरे । अन्तिम ओभरमा नेपाललाई जितका लागि ३० रन चाहिएको थियो । यो असम्भवप्राय हो । क्रिजमा करण केसी थिए र हातमा एक विकेट मात्र थियो । केसी ५ बलसम्म लगातार बिट भए ।
ओभरको अन्तिम बलमा छक्का हानेपछि उनले केही राहत महसुस गरे । नेपालले मंगोलियाविरुद्धको म्याचमा २६ छक्का प्रहार गरेर टि–२०मा सर्वाधिक छक्काको विश्वकीर्तिमान बनाइसकेको छ ।
