२१ असोज,एजेन्सी ।
परराष्ट्र मन्त्री एनपी साउदले इजरायलमा लामो र कठिन हुनसक्ने बताएका छन् । प्रतिनिधिसभाको बैठकमा इजरायलमा रहेका नेपालीहरूलाई सहयोग गर्न सरकार प्रतिबद्ध रहेको बताएका छन्। उनले भने, ‘अन्तर्राष्ट्रिय सञ्चारमाध्यममा बेलायतका प्रधानमन्त्रीले जनाएअनुसार इजरायल युद्धमा रहेको र सो युद्ध लामो र कठिन रहने बताउनुभएको छ।
त्यहाँको सुरक्षा वातावरण केही समयसम्म जटिल र संवेदनशील रहने देखिन्छ। सरकार इजरायलमा रहेका नेपालीहरूलाई आवश्यक सहयोग समन्वय र सहजीकरण गर्नको लागि पूर्ण प्रतिबद्ध रहेको छ।’ साउदले इजरायलमा रहेका १२ नेपाली सम्पर्कविहीन भएको बताएका छन् । बैठकमा इजरायल घटनाबारे जानकारी गराउँदै सुदूरपश्चिम विश्वविद्यालयबाट गएका विद्यार्थीहरू सम्पर्कविहीन भएको उनले बताएका छन् ।
उनले भने, ‘दक्षिणी इजरायलको किबुज अलुमिन भन्ने स्थानमा अध्ययनरत विद्यार्थीहरू सम्पर्कविहीन भएका छन्। राजदूतावासको अनुसार यो स्थान गाजा क्षेत्रबाट नजिक रहेका र त्यही हमास समूहबाट आक्रमण भएकाले १७ जना नेपालीहरूमध्येबाट २ जना सकुशल रहेको तीन जनाको स्थानीय अस्पतालमा उपचार भइरहेको छ।
बाँकी १२ जना सम्पर्कमा नभएको र केही हताहत भएको हुँदा स्थिति यकिन गर्न संयन्त्र परिचालन गरिएको छ।’ इजरायलमा रहेका नेपालीहरूको वास्तविक स्थिति पहिचान गर्न, नेपालीहरूलाई सुरक्षित तवरले राख्न, उद्धार तथा सहयोग गर्नको लागि आवश्यक सहजीकरण र समन्वय भइरहेको उनले बताएका छन् । हाल इजरायलमा ४ हजार ५ सय नेपाली केयर गिभरका रुपमा कार्यरत रहेको मन्त्री साउदले बताए।
उनका अनुसार इजरायल सरकारको ‘लर्न एन्ड अर्न’ कार्यक्रममा गएका विद्यार्थीं २६५, कृषि विश्वविद्यालयबाट ११९, त्रिभुवन विश्वविद्यालयबाट ९७ र सुदूरपश्चिम विश्वविद्यालयबाट ४९ जना गएका छन्। यस्तै परराष्ट्रमन्त्री साउदले नेपालका लागि इजरायली राजदूत हनान गोडरसँग छलफल गरेका छन् ।
आइतबार मन्त्रालयमा बोलाएर उनले राजदूत गोडरसँग इजरायलमा हमासले गरेको आक्रमणका बारेमा छलफल गरेका हुन् । छलफलका क्रममा उनले इजरायलको हालको अवस्था, इजरायलमा रहेका नेपालीको सुरक्षा, आक्रमणमा परेका नेपालीको उपचार र उद्धारबारे कुराकानी गरेका छन् ।
जवाफमा राजदूत गोडरले इजरायली सरकारका तर्फबाट नेपालीको सुरक्षा, घाइतेको उपचार र उद्धारमा पूर्ण प्रयास रहने प्रतिवद्धता जनाएका छन् । उनले इजरायलको कठिन समयमा नेपालले व्यक्त गरेको सहानुभूतिप्रति सरकारलाई धन्यवादसमेत दिएका छन् ।
शनिवार इजरायलमा प्यालिस्टाइनी विद्रोही समूह हमासले सुरु गरेको आक्रमणपछि हालसम्म ३०० भन्दा बढी इजरायलीको ज्यान गएको बताइएको छ । १५०० भन्दा बढी इजरायली पनि घाइते भएका छन् । अहिले इजरायलबाट पनि गाजापट्टीमा आक्रमण जारी छ । हमासको आक्रमणपछि मानिसहरू घरमै थुनिएका छन् । प्रधानमन्त्री बेन्जामिन नेतन्याहुले नागरिकहरूलाई शेल्टरमा मात्रै बस्न आग्रह गरेका छन् ।
