२५ असोज, विराटनगर ।
सत्ता गठबन्धनले कोशी प्रदेशको मुख्यमन्त्रीमा माओवादी केन्द्र संसदीय दलका नेता इन्द्र आङ्बोलाई अघि सार्ने निर्णय गरेको छ । बिहीबार बालुवाटारमा बसेको सत्ता गठबन्धनको बैठकले माओवादी केन्द्र संसदीय दलका नेता आङ्बोलाई मुख्यमन्त्रीको उम्मेदवार बनाउने निर्णय गरेको नेकपा एसका उपाध्यक्ष राजेन्द्र पाण्डेले जानकारी दिए ।
कोशीको मुख्यमन्त्रीमा यसअघि कांग्रेसले पनि दाबी गरेको थियो । तर, मुख्यमन्त्रीको उम्मेदवारका विषयमा सभापति शेरबहादुर देउवा र नेता डा. शेखर कोइरालाबीच विवाद भएको थियो । कांग्रेस आन्तरिक विवादमा फसेपछि सत्ता गठबन्धनको बैठकले कोशीको मुख्यमन्त्रीमा माओवादीका आङ्बोलाई अघि बढाउने निर्णय गरेको हो । यससंगै कोशी काँग्रेसमा भाडभैलो सुरु भएको छ ।
आङ्बोलाई मुख्यमन्त्रीको उम्मेद्वार बनाउने सत्ता गठबन्धनको निर्णय काँग्रेस प्रदेशका केही सांसदहरुले अस्वीकार गर्ने घोषणा गरेका छन् । आङ्बोलाई मुख्यमन्त्री दिने निर्णयमा शेखर कोइराला समूहका ९ जना सांसदहरू असन्तुष्ट देखिएका हुन् ।
प्रदेशमा केदार कार्की, शमशेर राई, गोविन्द गिरी, लीला राई, रामकुमार खत्री, गयानन्द मण्डल, इन्दिरा थापा , मानबहादुर लिम्बू र सुनिता गुरुङले गठबन्धनको निर्णयको विपक्षमा उभिने तयारी गरेका हुन् । उनीहरु सबै शेखर कोइराला पक्षमा सांसद हुन् ।
यता बिदा हुनै लागेका मुख्यमन्त्री हिक्मत कार्कीले भने काँग्रेसले संस्थागत निर्णय गरेर आए छलफलका लागि तयार रहेको प्रतिक्रिया दिएका थिए । तर सत्ता गठबन्धनले माओवादीलाई नै मुख्यमन्त्री दिने निर्णय गरेको हो । कोशीमा प्रदेश प्रमुख परशुराम खापुङले संविधानको धारा १६८ को ५ अनुसार मुख्यमन्त्रीमा दाबी गर्न शुक्रबार साँझ ५ बजेसम्मको समय दिएका छन् ।
धारा १६८ (५) अनुसार सरकार गठन हुँदा सांसदहरूलाई दलको ह्वीप लाग्दैन । प्रदेशसभाबाट विश्वासको मत पाउन नसक्ने निश्चित भएपछि कोशी प्रदेशका मुख्यमन्त्री हिक्मत कार्कीले असोज २० मा पदबाट राजीनामा दिएका थिए । त्यसपछि प्रदेशमा सरकार बनाउने अन्तिम विकल्प बमोजिम १६८ को उपधारा ५ अनुसार सरकार गठनको आह्वान भएको हो ।
काँग्रेस र माओवादी दुवैले सरकारको नेतृत्वमा दाबी गरेका बेला गठबन्धनले माओवादी नेता आङ्बोलाई अघि सार्ने निर्णय गरेको हो । प्रदेशमा काँग्रेसका २९ सांसद छन् । शेखर कोइराला पक्षका ९ जना गठबन्धनको विपक्षमा उभिए र एमालेले गठबन्धन भाँड्न त्यो समूहलाई सघाउने कदम चाले सरकार बनाउन पुग्ने संख्या पुग्छ ।
एमालेसँग उपसभामुखसहित ४० सांसद छन् । सरकारको नेतृत्व दाबी गरिरहेको नेकपा माओवादी केन्द्रसँग १३ नेकपा एकीकृत समाजवादी ४ र जनता समाजवादीसँग एक जना सांसद् छन ्। हालसम्म तटस्थ देखिएको राप्रपासँग ६ जना सांसद छन् । ९३ सदस्यीय कोशी प्रदेशसभामा बहुमतका लागि कम्तीमा ४७ जना प्रदेशसभा सदस्यको साथ चाहिन्छ ।
