१५ मंसिर, एजेन्सी ।
युरोपियन क्लब फुटबलको सबैभन्दा ठूलो प्रतियोगिता युरोपियन च्याम्पियन्स लिगमा १० हजारौँ गोल पूरा भएको छ । यो कीर्तिमानी बनाउँने खेलाडी हुन्, सर्जियो रामोस । रामोसले च्याम्पियन्स लिगअन्तर्गत बुधबार राति खेलिएको समूह ‘बी’ अन्तर्गतको खेलमा उक्त गोल गरेका हुन् ।
पीएसभी आइन्डहोभन विरुद्धको खेलको २४औँ मिनेटमा रोमोसले स्पेनिस क्लब सेभिल्लाका लागि गोल गरेका थिए । ३७ वर्षीय अनुभवी खेलाडी रामोसले गरेको त्यही गोल नै च्याम्पियन्स लिगको इतिहासमा १० हजारौँ गोल बन्न पुग्यो । यद्यपि, उक्त खेलमा भीएसभीले सेभियालाई ३—२ गोलले हराएको थियो ।
पीएसभी च्याम्पियन्स लिगको नकआउट चरणमा पुग्न सफल भयो भने सेभिया समूहगत चरणबाटै बाहिरियो । स्पेनिस खेलाडी रामोसले इभान राकिटिचको पासमा उक्त गोल गरेका थिए । रामोसले च्याम्पियन्स लिगमा आफ्नो पहिलो गोल भने सन् २००५ को डिसेम्बरमा गरेका थिए ।
त्यतिबेला रामोस अर्को स्पेनिस क्लब रियल म्याड्रिडबाट ब्यवसायिक फुटबल खेल्थे । आफूले पहिलो गोल गरेको ६ हजार सात सय ७३ दिनपछि रोमोसले च्याम्पियन्स लिगको इतिहासमा ऐतिहासिक गोल गरेका हुन् । यसअघि कुनै पनि खेलाडीले च्याम्पियन्स लिगमा आफूले पहिलो गोल गरेको यति लामो समयपछि अर्को गोल गर्न सकेको थिएन ।
रामोस च्याम्पियन्स लिगको इतिहासमा सबैभन्दा बढी उमेरमा गोल गर्ने खेलाडीहरुको सूचिमा पनि दरिन पुगेका छन् । उनी यो सूचिको चौथो स्थानमा उक्लिएका छन् । च्याम्पियन्स लिगमा गोल गर्ने सबैभन्दा बढी उमेरका खेलाडी भने रियल म्याड्रिडका पूर्वखेलाडी पेपे हुन् । उनले ४० वर्षको उमेरमा च्याम्पियन्स लिगमा गोल गरेका थिए ।
यस्तै हिजै भएको समूह बी को खेलमा फ्रान्सेली क्लब लेन्समाथि फराकिलो जितका साथ आर्सनल समूह विजेता बनेको छ । घरेलु मैदान इमिरेट्स रंगशालामा आर्सनलले लेन्सलाई ६–० ले पराजित गर्यो । आर्सनलले खेलको सुरुवाती २७ मिनेटमै ४–० को अग्रता बनाएको थियो । क्लबका लागि ६ फरक खेलाडीले गोल गरे ।
काइ हाभर्ट्ज, ग्याब्रीएल जेसस, बुकायो साका र ग्याब्रिएल मार्टिनेलीले सुरुवाती समयमा गोल गर्दा मार्टिन ओडेगार्डले पहिलो हाफको इन्ज्युरी समयमा पाँचौ गोल थपे । दोस्रो हाफको ८६ औं मिनेटमा जर्जिन्होले पेनाल्टीमा गोल गर्दै ६–० को जित दिलाए । आर्सनलको ५ खेलमा १२ अंक तथा पिएसभीको ५ खेलमा ८ अंक छ । लेन्सको ५ र सेभिल्लाको २ अंक मात्र छ ।
