२६ मंसिर, एजेन्सी ।
अमेरिकी मेजर लिग सकर (एमएलएल)को टिम इन्टर मियामीले प्रि–सिजन एसिया भ्रमणमा साउदी अरेबियन क्लब अल नासर र अल हिलालसँग खेल्ने भएको छ । मियामीले मंगलबार सामाजिक सञ्जालमार्फत प्रि–सिजन एसिया भ्रमणमा साउदी अरेबियाका दुई शीर्ष क्लबसँग खेल्ने पुष्टि गरेको हो ।
योसँगै फुटबल खेलका दुई महान हस्ती लियोनेल मेसी र क्रिष्टियानो रोनाल्डो झन्डै एक वर्षपछि आमने–सामने हुने भएका छन् । मेसी र रोनाल्डो सर्वकालीन फुटबलका महान खेलाडी हुन् । यी दुवैका करोडौं समर्थक रहेका छन् । मेसीले मियामीको कप्तानी सम्हालिरहँदा रोनाल्डो अल नासरका कप्तान हुन् ।
यो खेल आगामी वर्षको फेब्रुअरी १ मा हुनेछ । त्यसअघि मियामीले ब्राजिलियन फरवार्ड नेइमारको टिम जो साउदी प्रो लिगको शीर्षस्थानमा रहेको छ, अल हिलालसँग खेल्ने छ । यो खेल जनवरी २९ मा हुनेछ । यो टोलीमा ब्राजिली स्टार नेयमार रहेपनि उनी चोटका कारण यस खेलमा उपस्थित हुनेछैनन् ।
यी दुवै खेल रियादस्थित किंगडम एरिना रंगशालामा हुनेछ । प्रि सिजनमा मेसीको कप्तानीमा रहेको इन्टर मियामीले साउदीका दुई क्लबसँग राउन्ड रोविन लिगको आधारमा रियाद सिजन कप खेल्ने पुष्टि गरेसँगै मेसी र रोनाल्डोबीच प्रतिस्पर्धा हुने पक्का भएको हो ।
अल नासरमा रोनाल्डोसँगै साडियो माने, एमेरिक लापोर्टा, एन्डरसन टालिस्का, मार्सेलो ब्रोजोभिच, सेको फोफाना र डेभिड ओस्पिना रहेका छन् । रोनाल्डो र मेसीको अन्तिम भेट पनि गत जनवरी १९, २०२३ मा मैत्रीपूर्ण खेलमा भएको थियो । त्यहा मेसीको पेरिस सेन्ट जर्मेन (पिएसजी) ले रोनाल्डोको रियाद अल–स्टार्स इलेवनसँग खेलेको थियो ।
इंग्लिस म्यानचेस्टर युनाइटेडबाट बाहिरिएपछि रोनाल्डोको साउदी अरबमा यो पहिलो खेल थियो, जसमा पिएसजी ५–४ ले विजयी हुँदा दुवै खेलाडीले गोल गरेका थिए । पिएसजी छाडेपछि मेसीलाई साउदी लिगमा खेल्ने प्रस्ताव प्राप्त गरेपनि उनले मियामीसँग सम्झौता गरे ।
जहाँ उनले टोलीलाई लिग कपमा ट्रफी जिताउन नेतृत्व गरे । आफ्नो ऐतिहासिक करिअरमा मेसी र रोनाल्डो ३५ पटक आमने–सामने भएका छन् । जसमा मेसीले १६ पटक रोनाल्डोको १० पटक जितेका छन् । ९ बराबरी भएको छ । मेसीले २१ गोल र १२ असिस्ट दिदा रोनाल्डोले २० गोल र एक असिस्ट दिएका छन् ।
मेसी र रोनाल्डोबीचको पहिलो खेल सन् २००८ मा युइएफए च्याम्पियन्स लिगमा भएको थियो । त्यसबेला रोनाल्डो म्यानचेस्टर युनाइटेडमा तथा मेसी बार्सिलोनामा रहेका थिए । मेसी आफ्नो देशलाई विश्वकप फुटबल जिताउन सफल भईसकेका छन् भने रोनाल्डोले त्यो अवसर पाउन सकेका छैनन् ।
पोर्चुगल सन् १९६६ विश्वकपमा तेस्रो बन्नु नै अहिलेसम्मको ठूलो उपलब्धि हो । मेसीले विश्व फुटबलको प्रतिष्ठित बालेन डि ओर अवार्ड २०२३ सहित सर्वाधिक आठौं पटक हात पारेका छन् भने रोनाल्डोले ५ पटक सो अवार्ड जितेका छन् ।
