१५ पुष, एजेन्सी ।
रुसले युक्रेनमा आक्रमण गरेपछिको दुई वर्षमा युक्रेनले रुसविरुद्ध ठूलो बदला लिएको छ । रसियाको सीमावर्ती सहर बेलग्रेडमा शनिबार भएको गोलाबारीमा तीन बालबालिकासहित कम्तीमा २१ जनाको मृत्यु भएको छ। आक्रमणमा ११० जना घाइते पनि भएका छन् । रुसी अधिकारीहरूले आक्रमणको लागि युक्रेनलाई दोष दिएका छन्।
बेलग्रेडमा भएको आक्रमणको एक दिनअघि रुसले युक्रेनमा १८ घण्टा लामो हवाई हमला गरी ४१ सर्वसाधारणको ज्यान लिएको थियो । त्यसपछि युक्रेनको सीमावर्ती बेलग्रेडमा यो गोलीबारी भएको हो । रुसले २२ महिनाअघि युक्रेनमा आक्रमण गरेपछि यो आक्रमण सबैभन्दा घातक आक्रमण हो। मस्कोको सेनाले शुक्रबार युक्रेनमा १२२ मिसाइल र दर्जनौं ड्रोन हमलाहरू प्रहार गरेको थियो ।
जसमा वायुसेनाका एक अधिकारीले युद्धको सबैभन्दा ठूलो हवाई आक्रमणको रूपमा वर्णन गरेका छन्। यसपछि बेलग्रेडका गभर्नर व्याचेस्लाभ ग्लाडकोभले आक्रमणमा तीन बालबालिकासहित कम्तीमा २१ जनाको मृत्यु भएको र ११० जना घाइते भएको बताएका छन् । आक्रमण पछि बेलग्रेडका तस्बिरहरूमा जलिरहेको कारहरू र क्षतिग्रस्त भवनहरूबाट कालो धुवाँको मुस्लो निस्किरहेको र हवाई आक्रमणको साइरन सुनिएको देखाइएको छ।
बेलग्रेडमा गोलाबारीको क्रममा शहरको बीचमा रहेको सार्वजनिक आइस रिंकलाई पनि निशाना बनाइएको थियो। सहरमा यसअघि पनि हमला भइसकेको छ । तर यस प्रकारको गोलाबारी विरलै दिनको उज्यालोमा भएको छ र यसअघिका आक्रमणहरूमा यति ठूलो संख्यामा मानिस मारिएका थिएनन्।
रुसको रक्षा मन्त्रालयले आक्रमणमा प्रयोग भएको गोलाबारुद चेक (गणतन्त्र) ले निर्मित भ्याम्पायर रकेट र गोलाबारुदले सुसज्जित ओल्खा मिसाइलको रूपमा पहिचान गरेको जनाएको छ। मन्त्रालयले सामाजिक सञ्जालमा जारी गरेको विज्ञप्तिमा यो अपराधलाई छाडिने छैन् भनिएको छ ।
यसअघि शनिबार रुसी अधिकारीहरूले देशको मस्को, ब्रायान्स्क, ओरियोल र कुर्स्क क्षेत्रमा ३२ युक्रेनी ड्रोनलाई हवाई क्षेत्रमा खसालेको जानकारी दिएका थिए। मे महिनादेखि पश्चिमी रूसका शहरहरूमा लगातार ड्रोन आक्रमणहरू भइरहेका छन् र रुसी अधिकारीहरूले यसका लागि युक्रेनलाई दोष दिन्छन्।
युक्रेनी अधिकारीहरूले रूसी क्षेत्र र क्रिमियन प्रायद्वीपमा आक्रमणको जिम्मेवारी कहिल्यै लिएका छैनन् । रुसमा नजिकिदो राष्ट्रपति निर्वाचनका बीच यो आक्रमणपछि राष्ट्रपति भ्लादिमिर पुटिन थप आक्रमक र दबाब आउने विश्लेषण गरिएको छ ।
