२ माघ, काठमाण्डौ ।
त्रिभुवन अन्तर्राष्ट्रिय विमानस्थलको भन्सारपछिल्लो समय सुन तस्करको अखडा बनेपछि त्यस क्षेत्रको सुरक्षाका लागि सशस्त्र प्रहरी परिचालन गरिएको छ । यसअघि निजी सुरक्षा कम्पनीका सुरक्षागार्ड राख्ने गरिएको स्थानमा अब शसस्त्र प्रहरी राख्न थालिएको हो ।
स्टार सेक्यूरिटीका १८ जना कर्मचारी भन्सार चेकिङमा खटिएका थिए । उनीहरुलाई मासिक १६ हजार १ सय रुपैयाँको दरले तलब दिइने गरिएको थियो । त्रिभुवन भन्सार कार्यालयको सिफारिस र गृहमन्त्रालयको स्वीकृतिसँगै सोमबारदेखि विमानस्थलको भन्सार क्षेत्रमा सशस्त्र प्रहरी खटाइएको हो ।
सुनको अवैध तस्करी हुन थालेपछि सशस्त्र खटाइएको हो । अहिले इन्स्पेक्टरको कमाण्डमा ३० प्रहरी परिचालन गरिएको छ । भन्सारका कर्मचारीको रेखदेखमा उनीहरु खटिने छन् । ‘अब भन्सार चेकिङमा सशस्त्र प्रहरीले डियुटी गर्न थालेको छ,’भन्सार कार्यालयका प्रमुख टोकराज पाण्डेले भने ।
भन्सार चेकिङमा कर्मचारी मात्र हुँदा समस्या भएको भन्दै सुरक्षाकर्मी पनि राख्न आवाज उठ्दै आएको थियो । तस्करीले भन्सारका कर्मचारीलाई प्रलोभनमा पारेर तस्करी गर्ने गरेका थिए । थप एक निकाय भएपछि सेटिङको समस्या कम हुने अपेक्षा गरिएको छ ।
