४ माघ ,एजेन्सी ।
आयोजक तथा डिफेन्डिङ च्याम्पियन कतार एसियन कप–२०२३ को नकआउट चरण पुग्ने पहिलो टिम बनेको छ । बुधबार लगातार दोस्रो जित निकाल्दै कतार घरेलु भूमिमा भइरहेको प्रतियोगिताको अन्तिम १६ मा प्रवेश गरेको हो । उसले बुधबारको खेलमा ताजाकिस्तानलाई १–० ले हरायो ।
अल बयाट स्टेडियममा भएको खेलमा कतारका लागि अक्रम आफिफले निर्णायक गोल गरे । ताजाकिस्तान भने खेलको अन्यमा दश खेलाडीमा सीमित भएको थियो । अमाडोनी कामालोभलाई रातो कार्ड देखाइएको थियो । अक्रम अफिफले १७औं मिनेटमा गरेको गोल खेलको निर्णायक बन्यो ।
अफिफले लेबनान विरुद्धको जितमा २ गोल गरेका थिए । त्यस्तै बुधबार नै भएको सोही समूहको पहिलो खेलमा चीन र लेबनानले गोलरहित बराबरी खेलेका थिए । अब समूह चरणको अन्तिम खेलमा घरेलु टोली कतारले चीनसँग र लेबनानले ताजकिस्तानसँग खेल्ने छन् । एसियन कपमा कतार उपाधि दाबेदार राष्ट्र मध्येको एक हो ।
२ चरणको खेलपछि समूह ए मा कतारको ६ अंक रहेको छ । चीनको २ अंक तथा ताजिकिस्तान र लेबनान समान १–१ अंकको छ । आज ३ खेल हुँदै छन् । साँझ ५ः१५ बजे समूह बीमा रहेका सिरिया र अष्ट्रेलिया भिड्ने छन् । सोही समूहको भारत र उज्वेकिस्तानबीचको खेल साँझ ८ः१५ बजे सुरु हुनेछ । राति ११ः१५ बजे समूह सीको खेलमा प्यालेस्टाइन र युएई आमने सामने हुन्छन् ।
