१७ माघ ,काठमाडौं ।
अन्तर्राष्ट्रिय मुद्राकोष (आईएमएफ)ले नेपालको आर्थिक वृद्धिदर सन् २०२४ मा पाँच प्रतिशतले हुने प्रक्षेपण गरेको छ । यो प्रक्षेपण आईएमएफले मंगलबार सार्वजनिक गरेको वर्ल्ड इकोनोमिक आउटलुक २०२४ मा उल्लेख छ । नेपाल राष्ट्र बैंकले पनि गत महिना जारी गरेको प्रक्षेपणमा नेपालको आर्थिक वृद्धिदर चारदेखि पाँच प्रतिशतको बीचमा हुने जनाएको थियो ।
आईएमएफका प्रमुख अर्थशास्त्री पीएरे ओलिभर गुरान्चासले विश्व अर्थतन्त्रमा मुद्रास्फिति निरन्तर घट्दै वृद्धितर्फ उन्मुख भएर सफ्ट ल्यान्डिङतर्फ उन्मुख भएको जारी प्रतिवेदनमा उल्लेख गरेका छन् । साथै, उनले अर्थतन्त्र विस्तार सुस्त भएको जनाउँदै अगाडि बाधाहरू हुनसक्ने उल्लेख गरे ।
वर्ल्ड इकोनोमिक आउटलुकका अनुसार विश्व अर्थतन्त्र सन् २०२४ मा तीन दशमलव एक प्रतिशतले वृद्धि हुने जनाइएको छ । प्रतिवेदनले अमेरिकाको आर्थिक वृद्धिदर दुई दशमलव एक प्रतिशत हुने देखाएको छ । त्यसैगरी सन् २०२४ को मुद्रास्फिति दर ६ दशमलव सातले बढ्ने जनाएको छ ।
नेपालका दुई छिमेकी राष्ट्रहरू भारत र चीनको आर्थिक वृद्धिदर साढे ६ प्रतिशत र चार दशमलव ६ प्रतिशत हुने आईएमएफको प्रक्षेपण छ । भारत निरन्तर तीब्र र आर्थिक वृद्धि गर्ने राष्ट्रमध्ये एक बनेको छ । ‘वर्ल्ड इकोनोमिक आउटलुक’ रिपोर्ट को प्रतिवेदनमा आगामी दुई वर्षमा भारतको विकास बलियो रहने उल्लेख गरिएको छ ।
प्रतिवेदनले विश्व स्तरमा कुरा गर्दै सन् २०२५ मा विश्वव्यापी वृद्धिदर ३ दशमलव १ प्रतिशत पुग्ने र आगामी वर्ष २०२५ मा वृद्धिदर ३ दशमलव २ प्रतिशत पुग्ने प्रतिवेदनमा उल्लेख छ । योसँगै भारतको प्रमुख प्रतिद्वन्द्वी चीन तथ्याङ्कमा भारतभन्दा निकै पछाडि छ ।
आईएमएफका अनुसार सन् २०२४ मा चीनको वृद्धिदर ४.६ प्रतिशत र २०२५ मा ४.१ प्रतिशत हुने अनुमान गरिएको छ । यदि आइएफको तथ्याङ्कलाई विश्वास गर्ने हो भने, चीनले २०२५ मा झट्काको सामना गर्न सक्छ। योसँगै विश्वको सबैभन्दा बलियो र ठूलो अर्थतन्त्र अमेरिकाको वृद्धिदर पनि घट्ने अनुमान प्रतिवेदनमा गरिएको छ ।
सन् २०२३ मा २.५ प्रतिशत रहेको अमेरिकाको वृद्धिदर २०२४ मा २.१ प्रतिशत र २०२५ मा १.७ प्रतिशत मात्र हुनेछ। रिपोर्टको तथ्यांक अमेरिकाका लागि डरलाग्दो साबित हुन सक्ने देखिएको छ । प्रतिवेदनमा अमेरिका र चीनमा विकासको आशा कम गरिएको छ । यसको मुख्य कारण अमेरिकाको कडा आर्थिक नीति र चीनको मुख्य कारण कमजोर उपभोग र कमजोर लगानीलाई मानिएको छ ।
