विराटनगर, भदौ २९
मोरङको सुन्दरहरैंचा नगरपालिकामा रहेको पर्यटकीय स्थल गोकुलमले हवाईजहाज भित्रयाएको छ । एक निजी कम्पनीको ग्राउण्डेड जहाज रिसोर्टमा म्युजियमका लागि भित्र्याएको रिसोर्ट सञ्चालक गिरिस दङ्गालले जानकारी दिए । काठमाडौंबाट ल्याइएको सो ग्राउण्डेड जहाज रिसोर्ट परिसरमा राखिएको छ ।
रिसोर्टको एक महत्वपूर्ण भागको रूपमा विकास गर्ने उद्धेश्य बमोजिम सो जहाज ल्याइएको सञ्चालकले बताएका छन । गोकुलममा थुप्रै आकर्षण रहेका मध्य अबको थप आर्कषण जहाज हुने सञ्चालक दङ्गालले बताए । यसअघि धनगढीमा पाइलट वेद उप्रेतीले जहाजलाई म्युजिमको रूपमा विकास गरेका थिए ।
बिग्रिएको सो जहाजलाई आकर्षक ढङ्गले सजाएर म्युजियमको रूपमा विकास गरेपछि नेपालभरबाट पर्यटक धनगढी पुुग्ने गरेका छन । पछिल्लो समय काठमाडौको सिनामंगलमा पनि जहाजको म्युजियम सञ्चालनमा आएको छ । गोकुलम सुरु हुने जहाजमा म्युजियम प्रदेश कै पहिलो जहाज म्युजियम हुने भएको छ । रिसोर्टले दशैंअगाडि नै जहाजभित्रको म्युजियम सञ्चालनमा ल्याउने तयारी गरेको छ ।
गोकुलम रिसोर्टमा सञ्चालनमा आएका फन पार्कदेखि, धरहरा, ताजमहल, मन्दिर लगायत बालबालिकादेखि बृद्धसम्मलाई समेटने गरी निर्माण गरिएका संरचनाका कारण सो रिसोर्टका दैनिक १ हजार बढी आन्तरिक र बाह्य पर्यटक भित्रिने गरेका छन ।
२०७२ सालमा गएको बिनाशकारी भूकम्पले काठमाडौमा रहेको ९ तले धरहरा ढलेपछि अहिले सम्म उठ्न सकेको छैन । काठमाडौको धरहरा ढलेपनि गोकुलम रिसोर्टमा धरहरा ठ्डयाईएको छ । धरहरा हेर्न आउनेको घुँईचो पनि गोकुलममा लागेको छ ।
धरहरा निर्माण गरिएपछि गोकुलम आउने आन्तरिक तथा बाह्य पर्यटकको घुईचो बढेको छ । बालबालिकाको लागी फनपार्क मात्र नभएर रिसोर्टमा बृद्धबृद्धाहरुका लागी मन्दिर समेत निर्माण गरिएको छ ।
उनीहरु मन्दिरमा गएर भजन किर्तन गर्न र मन शान्त बनाउन सकुन भन्ने हेतुले मन्दिर निर्माण गरिएको छ । रिसोर्टमा घोडचढी गर्नेहरुका लागी घोडाको ब्यबस्था गरिएको छ भने नेपालमा नपाईने उँट समेत आकर्षणका रुपमा पहिलोपटक रिसोर्टमा भित्रयाइएको छ ।
