२० चैत ,एजेन्सी ।
लामो समयदेखि गृहयुद्ध र राजनीतिक अस्थिरतामा रुमलिरहेको सिरियाको राजधानी दमास्कसमा रहेको इरानको वाणिज्य दूतावासमा आक्रमण हुँदा सैन्य कमाण्डरसहित सात जनाको मृत्यु भएको छ । मृत्यु हुनेमा इरानको कुद्स फोर्सका कमाण्डर ब्रिगेडियर जनरल मोहम्मद रेजा जाहेदी, डेपुडी ब्रिगेडिएर जनरल मोहम्मद हादी हाजी रहीमी लगायत रहेको बीबीसीले जनाएको छ ।
मोहम्मद रेजा जाहेदी इरानका शीर्ष कमाण्डरमध्येका एक हुन् । सोमबार भएको यो आक्रमण कसले गरेको हो भन्ने खुलेको छैन । इरान र इजरायलबीच यस प्रकारको हत्याको इतिहास भए पनि इजरायलबाट हालसम्म कुनै प्रतिक्रिया सार्वजनिक भएको छैन । इजरायलको सेनाले विदेशी मिडियाको रिपोर्टमा कुनै टिप्पणी नगर्ने जनाएको बीबीसीले उल्लेख गरेको छ ।
सीरियाको रक्षा मन्त्रालयले आक्रमण इजरायलले गरेको जिकीर गरेको छ । इजरायली एयरक्राफ्टले गोलान हाइट्सबाट इरानको वाणिज्य दूतावासमा आक्रमण गरेको जनाएको छ । सिरियामा इरानको वाणिज्य दूतावास पश्चिमी मेजास्थित एक हाईवेमा छ । सिरियाले इजरायलका केही मिसाइललाई खसालेको र केहीलाई रोक्न नसकेको पनि जनाएको छ ।
यो आक्रमण स्थानीय समय अनुसार सोमबार साँझ करिब ५ बजेतिर भएको थियो । आक्रमण यति भयानक थियो कि ठूलो भवन पनि ध्वस्त भएको छ । इरान र सिरिया दुवै सरकारले आक्रमणको निन्दा गरेका छन् । इरानी राजदूत होसैन अकबरीले इजरायलको एफ–३५ लडाकु जेट विमानले आक्रमण गरेको जनाएका छन् ।
उनले सुरुमा इरानका सरकारी मिडियाहरुलाई पाँचदेखि सात जनाको मृत्यु भएको हुनसक्ने बताएका थिए । त्यसपछि रिभोल्युशनरी गार्डस्ले विज्ञप्ति जारी गर्दै मोहम्मद रेजा जाहेदी सहित सात अधिकारीको मृत्यु भएको पुष्टि गरेको थियो । जाहेदी सबैभन्दा हाईप्रोफाइल इरानी कमाण्डरको रुपमा चिनिन्छन् । इजरायल भने पछिल्लो समय चौतर्फी आक्रमणमा उत्रिएको छ ।
गाजापट्टीमा हमासविरुद्ध गएको अक्टोबरदेखि आक्रमण गरिरहेको इजरेलले लेबनानमा हिजबुल्लाविरुद्ध पनि आक्रमण गरिरहेको छ । गाजामा इजरेली आक्रमणमा परी ३२ हजारभन्दा बढीको मृत्यु भइसकेको छ भने लाखौ नागरिक विस्थापित भइसकेका छन् । राष्ट्रसंघसहित अन्तराष्ट्रिय समुदायबाट गाजामा युद्धविरामको आह्वान हुँदै आएपनि इजरेलले आफ्नो हमासविरुद्धको आक्रमण रणनीतिमा कुनै परिवर्तन गरेको छैन् ।
