३० चैत , काठमाण्डौ।
उत्तरी चीनको सीमा क्षेत्र ताप्लेजुङको फत्ताङलुङ गाउँपालिका– ७, ओलाङचुङगोलामा गाडी पुगेको छ । सडकको ट्रयाक छिचोलिएसँगै गएको मंगलवार पहिलोपटक सदरमुकाम फुङलिङबाट केही जिप र ट्याक्सीहरू पुगेका हुन् । तीन हजार दुई सय मिटर उचाइको यो बस्तीमा गाडी पुगेको दुई दिनपछि बिहीबार एमाले अध्यक्ष केपी शर्मा ओली, उपप्रधानमन्त्री एवम् भौतिक पूर्वाधार तथा यातायातमन्त्री रघुवीर महासेठ, रक्षामन्त्री हरिप्रसाद उप्रेती, एमाले सचिव तथा सांसद योगेश भट्टराईसहितका नेता ओलाङचुङगोला पुगेका थिए ।
केही वर्षअघि नै चीनसँगको सिमाना टिप्ताला भञ्ज्याङसम्म स्थानीयबासिन्दाको पहलमा सडक बनेको थियो । सदरमुकामतर्फबाट भने भर्खरै मात्र सडकको ट्रयाक छिचोलिएको हो । ओलाङचुङगोलाबाट चीनको तिब्बत स्वशासित क्षेत्र जोड्ने टिप्ताला भञ्ज्याङ २४ किलोमिटर मात्र उत्तरमा छ । कोभिडपछि भने नेपाल र चीनको नाका बन्द रहेको छ । ३२ सय मिटरको उचाइमा रहेको ओलाङचुङगोलामा जम्मा ५६ वटा घर छन् ।
सडक निर्माण कम्पनी एलाइट जेभीका साइट इन्चार्ज राजीव लामिछानेले बाटो सफा गर्ने, ग्रेडिङ मिलाउने कार्य सकिएपछि गोलासम्म फोरह्विल जिप तथा ट्याक्सी सदरमुकाम फुङलिङबाट गोला पुगेको बताएका छन् । एलाइट जेभीले फुङलिङदेखि ३८ किलोमिटर दूरीमा रहेको रानीपुलबाट गोलातर्फको बाटोको ट्र्याक ओपन, बाटो सफा गर्ने र ग्रेडिङ मिलाउने कार्य सकिएको जनाएको छ ।
सदरमुकाम फुङलिङबाट मित्लुङ, सिंवा हुँदै तमोर नदीको किनार भएर सडकको ट्र्याक खुलेपछि फुङलिङ–गोलाको दूरी पनि छोटिएको छ । उपप्रधानमन्त्री एवं भौतिक पूर्वाधारमन्त्री रघुवीर महासेठले अब बाह्रै महिना सवारी चलाउन मिल्ने गरी स्तरोन्नति गर्ने प्रतिबद्धता जनाएका छन् । उनले तमोर करिडोर त्रिदेशीय नेपाल, भारत र चीन जोड्ने सबैभन्दा छोटो मार्ग भएकाले यसलाई राष्ट्रिय गौरवको योजनामा समावेश गरी काम अगाडि बढाउने बताएका छन् ।
विहीबार ओलाङचुङगोलामा पुगेर ओलीले चीन र नेपालका यी नाका हुँदै विगतमा जनताले सम्बन्ध जोडेको चर्चा गर्दै अब कुनै पनि कारणले आवतजावत लगायत गतिविधि रोकिन नहुनेमा जोड दिए । उनले चीनलाई भारतसँग जोड्ने सबैभन्दा छोटो रुट ताप्लेजुङमा पर्ने भएकाले टिप्तालादेखि जोगवनीको बाटोलाई छिटो सुधार र सञ्चालनमा ल्याउन भौतिक पूर्वाधार मन्त्री महासेठलाई आग्रह गरे ।
उनले स्मरण गरेका छन्, नेपाल र चीनवीच पारवहन सन्धिपछि हामीले यो लगायत ९ वटा सडक मार्गले नेपाल र चीनलाई जोड्ने योजना अघि बढाएका थियौं ।ओलाङचुङगोलासम्म सडक पुगेसँगै यो अब चीनसँग जोडिएको तिप्ताला नाकासम्म सवारी साधन पुग्न सक्ने गरी जोडिएको छ । ८ वर्षअघि भारतीय नाकाबन्दीका बेला ओलीले उत्तरी सीमा नाका खुलाउने तथा चीनमार्फत अरु देशसँगको पहुँच पाउनु नेपालको भूपरिवेष्ठित देश हुनुको अधिकार रहेको वकालत गरेका थिए । त्यसयता उनी कुनै न कुनै रुपमा भारतसँग उतारचढावपूर्ण सम्बन्धमा छन् ।
