एजेन्सी,भदौ ३१
फिलिपिन्समा शनिबार शक्तिशाली आँधी आएपछि जनजीवन नराम्रोसँग प्रभावित भएको छ । फिलिपिन्सको उत्तरपूर्वी बगाओमा शक्तिशाली टाइफुन म्याङ्कुटले शनिवार विहान १ बजेर ४० मिनेटमा प्रवेश गरेको हो ।
आधीँले उत्तरी तटीय क्षेत्रमा विध्वंस मच्चाउन शुरु गरेको छ । स्थानीय समयानुसार गएराती १ बजेर ४० मिनेटपछि आँधी त्यहाँ आइपुगेको थियो । आँधीपछि त्यो क्षेत्रमा विद्युत आपूर्ति अवरुद्ध भएको छ । शनिबार सम्ममा आँधीका कारण सम्म तीन जनाको मृत्यु भएको र अरु चार जना घाइते भएका विवरण प्राप्त भएको अधिकारीहरुले जनाएका छन् । हजारौँ मानिसहरूलाई सुरक्षित स्थानमा सारिएको छ ।
फिलिपिन्सको उत्तरी क्षेत्रमा आएको आँधी र बर्षाले आफ्नो मार्गमा पर्ने क्षेत्रको धेरै भौतिक संरचनामा क्षति पु¥याउने अनुमान गरिएको छ । यस आँधीको मार्गमा ४० लाखभन्दा बढी मानिसहरू रहेका छन् । प्रतिघण्टा १८५ किलोमिटरका दरले आँधी आएको मौसम अधिकारीहरुले जानकारी दिएका छन् । उनीहरुले आँधी आउने बेलामा घरबाहिर ननिस्कन र सुरक्षित तरिकाले घरभित्रै बस्न आह्वान गरेका थिए ।
आँधी आउदो मङ्गलबारसम्म नै जारी रहने अनुमान गरिएको छ । फलिपिन्समा प्रत्येक बर्ष औसतमा २० ओटा यस्तै आँधी आउने गरेका छन् भने सयौँको मृत्यु हुनेगरेको छ । त्यसैका कारण दशौँ लाख गरिबीको रेखामुनी पर्ने गरेका छन् ।
आइतबार हङकङसम्म पुग्ने
आगामी आइतवार दिउँसोसम्ममा हङकङसम्म पुग्ने बताइएको छ । हङकङमा आँधी नजिकिँदै जाँदा आँधी सम्भावित क्षेत्रका मानिसलाई घरभित्रै बस्न आह्वान गरेका छन् । मौसमविद्हरूले हङकङ सिमानामा आउन लागेको म्याङ्कुट एक दशक यताकै शक्तिशाली भएको बताएका छन् ।
दर्जनौँ प्रान्तहरूमा आँधीबारे चेतावनी दिइसकिएको छ । सामुद्रिक र हवाइ यात्राहरूमा रोक लगाइ सकिएको छ । विद्यालयहरू बन्द गरिएका छन् र विपद् व्यवस्थापनका लागि सेना तयार भएर बसेको छ ।
