एजेन्सी,भदौ ३१
एसिया कप क्रिकेट अन्तर्गत उद्घाटन खेलमा समूह बी मा रहेको बंगलादेशले श्रीलंकाविरुद्ध १३७ रनको शानदार जित हात पारेको छ । दुबाईको सारजाह क्रिकेट मैदानमा टस जितेर पहिले ब्याटिङ गरेको बंगलादेशले ४९ दशमलव ३ ओभरमा सबै विकेट गुमाउँदै २ सय ६१ रन बनाएको थियो ।
बंगलादेशका लागि पूर्व कप्तान मुशफिकर रहीमले १ सय ४४ रनको उत्कृष्ट शतकीय इनिङ खेलेका थिए । बलिङतर्फ भेट्रान श्रीलंकाली बलर लसिथ मालिंगाले ४ विकेट लिन सफल भएका थिए । १० ओभर बलिङ गरेका उनले २ मेडन राख्दै मात्र २२ रन खर्चिएका हुन् ।
२ सय ६१ रनको लक्ष्य पछ्याएको श्रीलंकाका ब्याट्सम्यानहरुले कमजोर प्रदर्शन गरेका थिए । श्रीलंका ३५ दशमलव २ ओभरमा १ सय २४ रनमै समेटिएपछि बंगलादेशको १ सय ३७ रनको जित सम्भव भएको हो ।
