३० असार , काठमाण्डौ।
राष्ट्रिय स्वतन्त्र पार्टी (रास्वपा) का निष्कासित महामन्त्री डा. मुकुल ढकालले आफूलाई उपसभापति डा. स्वर्णिम वाग्लेको सचिवालयबाट भौतिक आक्रमण गर्ने धम्की आएको गम्भिर आरोप लगाएका छन् । शनिबार राति वाग्लेको सचिवालयबाट फोन गरी ‘कुट्ने, नछाड्ने’ धम्की आएपछि आफूले सुरक्षाका लागि प्रहरीलाई अनुरोधसमेत गरिसकेको दाबी मुकुलले गरेका छन्।
उनले आइतबार बिहान फेसबुकमा लेखेका छन्, ‘स्वर्णिम वाग्लेको सचिवालयबाट मलाई पटकपटक फोन गरे , फोन उठाइनँ। मसँगै बस्ने भाइलाई फोन गरेर ‘मुकुललाई कुट्छु, त्यसलाई छोड्दिनँ’ लगायत अनेक भनेकाले हिजै राति इलाकाको डीएसपीलाई फोन गरेर सुरक्षा व्यवस्था मिलाइदिन आग्रह गरेको छु।’
शनिबार राति एक टेलिभिजनसँगको अन्तर्वार्तामा मुकुलले ‘नेपाललाई भारतकै एउटा राज्य बनाउने प्रस्ताव राख्ने र रवि लामिछानेलाई प्रधानमन्त्री बनाउने समझदारी गर्न आफूलाई खटाइएको’ दाबी गरेका छन् । उनले रवि लामिछाने, स्वर्णिम वाग्ले, शिशिर खनाल र आफूसमेत काठमाडौँको एक होटलमा भारतीय राजदूतसँग भेट गरेको र सोही भेट सकेर फर्कने क्रममा लिफ्टमा स्वर्णिमले त्यस्तो प्रस्ताव गरेको जिकिर गरेका छन् ।
त्यही राति स्वर्णिम सचिवालयबाट कुट्ने धम्की आएको दाबी मुकुलले गरेका हुन्। तर स्टाटसमा उनले कारण खोलेका छैनन् । यसैबीच रास्वपाका उपसभापति स्वर्णिम वाग्लेको सचिवालयले निष्काशित महामन्त्री मुकुल ढकालको आरोप झुटो भएको दाबी गरेको छ । वाग्लेको सचिवालयका एक सदस्यले मुकुलनिकट एक व्यक्तिलाई फोन गरेको स्वीकार गरे पनि धाकधम्की नदिएको बताएका हुन् ।
‘उहाँको फोन नउठेपछि उहाँनिकट एक भाइलाई हामीले फोन गरेको हो’, ती सदस्यले भने, ‘तर धम्की दिएको होइन । उपसभापतिबारे उहाँले बोल्नुभएका कुराबारे जवाफ त दिनुपर्ने होला नि !’ महामन्त्रीबाट निष्काशित भएपछि विक्षिप्त बनेका ढकालले मनलाग्दी बोल्दै हिँडेको ती सदस्यले बताएका छन् । रास्वपाबाट कारबाहीमा परेपछि ढकालले नेतृत्वको भण्डाफोर गर्दै आएका छन् ।
महामन्त्रीसहित सम्पूर्ण पदीय जिम्मेवारीबाट मुकुललाई निष्काशन गरेपछि रास्वपाले पुनरावलोकनका लागि ३५ दिनको समय दिएको छ । तर पार्टीले साधारण सदस्य मात्रै रहनेगरी कारबाही गरेपछि मुकुलले भने अहिले पनि आफूनै रास्वपाको महामन्त्री नै रहेको तर रवि लामिछानेको क्लबबाट मात्रै आफूलाई हटाइएको बताउँदै आएका छन् ।
