१० साउन, एजेन्सी ।
विश्वकप फुटबल तथा भर्खरै कोपा अमेरिका च्याम्पियन बनेको विश्व च्याम्पियन अर्जेन्टिना पेरिस ओलम्पिक २०२४ को पुरुष फुटबलको पहिलो खेलमा नै हार्न पुगेको छ । मोरोक्कोसंग अर्जेन्टिना २–१ पराजित भएको छ ।
विवाद र अन्योलबीच खेल सकेको दुई घण्टापछि मात्रै अर्जेन्टिना हारेको निर्णय सुनाइएको हो । खेल सकिएको दुई घण्टापछि खाली रङ्गशालामा मोरक्कोले खेल जितेको निर्णय दिइएको हो ।
समूह ‘बी’ को सेन्ट स्टेयनमा भएको खेल २–२ को बराबरीमा टुङ्गेको मानिएको थियो । २–१ ले पछि परेको अवस्थामा अर्जेन्टिनाका क्रिस्टियन मेडिनाले दोस्रो हाफको इन्ज्युरी समयको १६ औँ मिनेटमा बराबरी गोल फर्काएका थिए ।
तर त्यो गोललाई भीएआरले मान्यता दिएन । त्यस लगतै दर्शकबाट मैदानमा बोतल फ्यालिएको थियो । केही दर्शक मैदानमा प्रवेश गरेका थिए । त्यसपछि रेफ्रीले खेल सकिएको निर्णय गरेका थिए । दुवै टिमले मैदान पनि छाडिसकेका थिए ।
तर रेफ्रीले खेल सकिएको सङ्केतमा सिठ्ठी भने बजाएका थिएनन् । त्यसपछि खेल सकिएको दुई घण्टापछि खेल मोरक्कोले जितेको निर्णय भएको हो ।
अर्जेन्टिनी प्रशिक्षक ज्याभिएर मास्केरानाले यो निर्णयले फुटबलकै बेइज्जत भएको र खेल सर्कसमा परिवर्तन भएको प्रतिक्रिया दिएका छन्। अर्जेन्टिनाका सुपरस्टार खेलाडी लियोनेल मेसीले पनि यस घटनामा आफ्नो प्रतिक्रिया दिँदै ’अविश्वसनीय’ भनेका छन् ।
अब अर्जेन्टिनाले समूह बी मा शनिबार इराकविरुद्ध खेल्ने तालिका छ भने मोरक्कोले सोहि दिन युक्रेनको सामना गर्दै छ । बुधबारकै अन्य खेलमा समूह डी मा जापानले पाराग्वेलाई ५–० ले हरायो ।
यस्तै समूह सी मा स्पेनले उज्वेकिस्तानलाई २–१ ले हरायो भने इजिप्ट र डोमिनिक रिपब्लिकले गोलरहित बराबरी खेले । यस्तै समूह बी मा इराकले युक्रेनलाई २–१ ले हरायो ।
