१० साउन, काठमाण्डौ।
नेपाल प्रहरी, देशको राष्ट्र सेवक कर्मचारी । नागरिकको जिउ धनको सुरक्षा गर्न, शान्ति सुव्यवस्था कायम गर्न, मानव अधिकारको संरक्षण गर्न एवं जनकल्याणकारी सेवाहरू प्रदान गर्ने सांगठनिक उद्धेश्य पूर्ति गर्न नेपाल प्रहरी सङ्गठन भित्र रहेर देशमा शान्ति सुरक्षा तथा अमन चयन कायम राख्ने कसम खाएका प्रहरी नै आफूले देश र जनताका लागि लिएका वचनबाट भाग्न थालेका छन् ।
देशभरबाट २९ प्रहरी कर्मचारी एकसाथ सम्पर्कविहीन भएका छन् । नेपाल प्रहरी प्रधान कार्यालयले सम्पर्कविहीन रहेका २९ प्रहरी कर्मचारीलाई सात दिनभित्र सम्पर्कमा आउन आग्रह गरेको छ ।
प्रहरी प्रधान कार्यालय, कानुन शाखाले बिहीबार सूचना जारी गर्दै एक साताभित्र सम्पर्कमा नआए उनीहरुलाई सेवाबाटै हटाउने चेतावनी दिएको हो।
प्रहरी नायव निरीक्षक (सई)देखि प्रहरी जवानसम्म २९ जना प्रहरी झन्डै दुई महिनादेखि आफूखुशी गैरहाजिर रहेको कार्यालयले जनाएको छ।
गैर हाजिर हुनेमा तीनजना सई, एक जना असई, दुईजना हबल्दार र बाँकी प्रहरी जबान रहेका प्रहरी प्रधान कार्यालयले जारी गरेको सूचनामा उल्लेख छ। समयमै हाजिर भए सफाइको मौका दिइने प्रहरी प्रधान कार्यालयले जनाएको छ।
आफूखुसी कार्यालयमा गैर हाजिर रहेको र खोजतलास गर्दा गराउँदा तथा प्रहरी नियमावली, २०७१ को नियम ११५ को देहाय (२) बमोजिम प्रक्रिया पूरा गरी सूचना टाँस भई सक्दा समेत कार्यालयको सम्पर्कमा नआउनु भएकोले सूचना प्रकाशित गरिएको कार्यालयको भनाइ छ।
सूचना प्रकाशित भएको मितिले बाटोको म्याद बाहेक सात दिनभित्र आफू गैर हाजिर रहनुको कारण खोली सन्तोषजनक स्पष्टीकरण जवाफ सहित यस कार्यालय वा सूचना जारी गर्ने कार्यालयमा हाजिर हुन नआएमा प्रहरी नियमावली, २०७१ को नियम ११३ को उपनियम (१) को खण्ड (च) को कसुरमा कारबाही प्रक्रिया अघि बढाइने सूचनामा उल्लेख छ ।
