३१ साउन, विराटनगर ।
काठमाडौंबाट ब्राउनसुगरसहित मोरङका तीन युवासहित आठ जनालाई प्रहरीले नियन्त्रणमा लिएको छ ।
काठमाडौं महानगरपालिका-३१ कोटेश्वरबाट ३३.७६ ग्राम ब्राउनसुगरसहित आठ जनालाई प्रहरी प्रभाग कोटेश्वरबाट खटिएको प्रहरी टोलीले नियन्त्रणमा लिएको हो ।
पक्राउ पर्नेहरूमा मोरङको कानेपोखरी गाउँपालिका-५ घर भई हाल ललितपुर इमाडोल बस्ने २१ वर्षीय रेमन राई, बेलबारी नगरपालिका-९ घर भई हाल कालोपुल बस्ने ३३ वर्षीय अमितकुमार चौधरी र बेलबारी-४ घर भई हाल ललितपुरको ग्वार्को बस्ने ३६ वर्षीय प्रमोद राई रहेका छन् ।
यस्तै, पाँचथर मिक्लाजुङ-४ का २८ वर्षीय मेहरमान भुजेल, फिदिम-१ घर भएका २७ वर्षीय टिम्पल तामाङ, फाल्गुनन्द-५ घर भएका २९ वर्षीय भीमकुमार चेम्जोङ, ललितपुर-१२ का २७ वर्षीय रफिस अवाले र काभ्रेपलाञ्चोकको नमबुद्ध-२ का १९ वर्षीय रिसफ श्रेष्ठ पक्राउ परेका हुन् ।
मंगलबार साँझ ६:२० बजेतिर कोटेश्वरमा शंकास्पद गतिविधि गरिरहेको अवस्थामा पक्राउ परेका उनीहरूका साथबाट ३३.७६ ग्राम ब्राउन सुगर, ८ ट्याब्लेट ट्रामाडोल, एक थान मोटरसाइकल, एक थान स्कुटर र ५५ हजार नगद बरामद गरिएको छ ।
