४ भदौ, काठमाडौं ।
राष्ट्रिय परीक्षा बोर्डको परीक्षा नियन्त्रण कार्यालयलाई कक्षा १२ को नतिजामा चित्त नबुझेहरूको पुनर्योग गरिसक्न हम्मे-हम्मे परेको छ ।
कक्षा १२ को गत साउन १८ गते प्रकाशित नतिजामा चित्त नबुझाएका करिब ४० हजार जनाले पुनर्योग माग गर्दै आवेदन दिएपछि पुनर्योगमा हम्मेहम्मे भएको हो ।
पुनर्योगका लागि आवेदन दिने विद्यार्थी संख्या अहिलेसम्मकै धेरै रहेको परीक्षा नियन्त्रक (कक्षा १२) कृष्णप्रसाद शर्माले बताए ।
अनलाइनमा आवेदन दिन पाउने सुविधाका कारण धेरै भएको उनको ठहर छ ।
कार्यालयले २२ साउनसम्म आवेदन दिएका ७ हजार विद्यार्थीको पुनर्योगको नतिजा सार्वजनिक गरिसकेको छ ।
नतिजाअनुसार अहिलेसम्म ५५ जनाको नतिजा परिवर्तन भएको छ । अहिलेसम्म शिक्षकहरूले उत्तरपुस्तिकाबाट पोस्टिङ गर्दा गल्ती भएको देखिएको राष्ट्रिय परीक्षा बोर्डको परीक्षा नियन्त्रण कार्यालयले जनाएको छ ।
