११ भदौ, विराटनगर ।
उमेरले ३९ वर्ष पुग्दासम्म फुटबलमा सक्रिय रहेका क्रिस्टियानो रोनाल्डोले कहिले सन्न्यास लेलान् भन्ने अड्कल काट्न गाह्रै छ । १८ वर्षको उमेदेखि पोर्चुगलका लागि अनवरत रूपमा खेलिरहेका रोनाल्डो सर्वाधिक खेल खेलेर सबैभन्दा धेरै गोल गरेका छन् ।
फुटबल इतिहासमा अनेकौं शीर्षकमा कीर्तिमान बनाएका रोनाल्डोले जित्न बाँकी भनेको फिफा विश्वकपको उपाधिमात्र हो । विश्वकपमा पनि उनको व्यक्तिगत उपलब्धि थुप्रै छन् । सन् २००६ मा २१ वर्षको उमेरमा विश्वकपमा पहिलो गोल गरेका रोनाल्डोले ३७ वर्षको उमेरमा सन् २०२२ मा गोल गरेका थिए । यस्तो रेकर्ड बनाउने अरू खेलाडी छैनन् ।
विश्वकपका विभिन्न पाँच संस्करण खेलेका रोनाल्डोले आफ्नो राष्ट्र पोर्चुगललाई युरोकप र युइएफए नेसन्स लिगको उपाधि जिताएका छन् । पोर्चुगलका कप्तानसमेत रहेका रोनाल्डो मैदानमा यतिधेरै मिहिनेत गर्छन्, २० सिजन त उनी शीर्ष गोलकर्ता नै बने ।
हुँदहुँदै दुई वर्षअघि युरोपियन लिगबाट बाहिर निस्किएर साउदी अरेबियन क्लब अल नासर पुगेका रोनाल्डोले डेब्यु सिजनमा १९ खेलमा १४ गोल गरे । तर, २०२३–२४ को सिजनमा उनी सर्वाधिक गोलकर्ता बने । साउदी प्रो लिगमा अघिल्लो सिजन ३५ गोल गर्दै ‘गोल्डेन बुट’ जितेका रोनाल्डोले अघिल्लो सिजन अल नासरले खेल्ने सबै प्रतियोगितामा ४५ खेल खेल्दा ४४ गोल गरे ।
युरोपका शीर्ष लिगहरूमा सनसनी मच्चाएर साउदी आएका रोनाल्डोले नयाँ सिजनको पहिलो खेलमै गोल गरे । अब, यस सिजन पनि उनी अल नासरलाई उपाधि जिताएर व्यक्तिगत उपलब्धिको फेहरिस्त लगाउने दाउमा छन् । सँगसँगै पोर्चुगलका लागि उपाधि जित्ने उनको योजना कायमै छ । तर, यसबीचमा उनीमाथि सन्न्यास कहिले लिने भन्ने प्रश्न तेर्सिने गरेकै छन् ।
हालै पाँच पटकका बालोन डी‘ओर विजेता रोनाल्डोलाई ‘एनओडब्यु’ मिडियाले सन्न्यास कहिले भन्ने प्रश्न सोधेको थियो । जसको जबाफमा उनले भनेका छन्, ‘मैले कहिले सन्न्यास लिन्छु भन्नेबारे म आफैंलाई थाहा छैन । मैले चाँडै सन्न्यास लिनुप¥यो भने आगामी दुई वा तीन वर्षमा लिन्छु । तर सम्भवतः म अल नासरबाटै सन्यास लिन्छु ।’
अल नासरमा आफू एकदमै खुसी रहेको बताउँदै रोनाल्डोले निरन्तर साउदीबाटै फुटबल खेल्ने आफ्नो चाहाना रहेको सुनाए । त्यसबाहेक आफ्नो राष्ट्रका लागि खेलिरहँदा गर्व अनुभूति गरेको रोनाल्डोको भनाइ छ ।
त्यसबीचमा उनलाई सन्न्यासपछि प्रशिक्षक बन्ने हो ? भन्ने प्रश्न सोधिएको थियो । जबाफमा रोनाल्डोले फुटबलभन्दा बाहिर रहेर रमाउने बताए । ‘म प्रशिक्षक बन्छु भनेर सोच्न पनि गाह्रो छ । म कुनै फुटबल टोलीको प्रशिक्षक बन्ने मनसायमा छैन । यसबारे त सोच्दिनँ पनि । हुन सक्छ, मैले मेरो भविष्य फुटबलबाहेक अरू केहीमा देखेको छु ।’
हालै रोनाल्डोले युट्युब च्यानल बनाएका छन् । जसमा झन्डै पाँच करोड सब्स्क्राइब पुग्न आँटेका छन् । यसतर्फ उनी खुबै रमाएका कारण युट्युबमै रोनाल्डो सक्रिय बन्छन् कि भन्ने अड्कलबाजी भइरहेको छ । उसै पनि रोनाल्डो ‘सोसल मिडिया लभर’ हुन् । सबै सामाजिक सञ्जालमा उत्तिकै सक्रिय रहने रोनाल्डोको एक्स (पूर्वट्वीटर) मा ११ करोड २६ लाख फलोअर्स रहेका छन् ।
सामाजिक सञ्जाल फेसबुकमा पनि उनले १७ करोड फलोअर्स छन् । यसका अतिरिक्त इन्स्टाग्राममा पनि उनको कीर्तिमानी ६३ करोड ६० लाख फलोअर्स रहेका छन् । युरोपका शीर्ष तीन लिगमा आबद्ध क्लबहरूबाट व्यवसायिक फुटबलको अनुभव संगालिसकेका रोनाल्डो विश्वकै सबैभन्दा धनी फुटबलर हुन् ।
