१५ भदौ, विराटनगर ।
प्रधानमन्त्री केपी शर्मा ओलीले पूर्वप्रधानमन्त्री पुष्पकमल दाहाल ‘प्रचण्ड’ले श्रीलंका र बंगलादेशबाट केही कुराहरू सिक्नुपर्ने उपदेश दिएको भन्दै आफूले केही गलत काम नगरेको बताएका छन् ।
शनिबार क्याप्टेन रामेश्वर थापाद्वारा लिखित ‘इन टु द फायर’ पुस्तक लोकार्पण समारोहमा उनले आफू गलत नभएको जिकिर गरेका हुन् ।
उनले भने, ‘प्रचण्डजीले श्रीलंका र बंगलादेशबाट सिक भनेर उपदेश दिनुभएछ । मैंले १७ हजार मान्छे मारेको छु र खुट्टा कमाउने ? लुटपाट गरेको छु र ? जसले चर्को स्वरमा सिक सिक भनिरहेको छ राम्रो तरिकाले आफैं सिक्नलाई आग्रह गर्दछु । नेपाल कुनै देशको फोटोकपी गर्ने देश होइन । यहाँ आफ्नै इतिहास र परम्परा छ । झुठ अहिलेसम्म बोलेको छैन, बोल्दिन् पनि । जानी-जानी कसैको अधिकार हनन गरेको छैन, गर्दिनँ । जानी-जानी कसैको अहित गरेको छैन, गर्दिनँ र नराम्रो काम गरेको छैन, गर्दिनँ .। तसर्थ म ढुक्क छु ।’
राजनीति र राज्य व्यवस्थालाई घृणा गर्नु भनेको सामाजिक अराजकता मात्र भएको उल्लेख गर्दै उनले यसले समाजलाई कुनै राम्रो परिणाम नदिने बताए ।
