१९ भदौ , काठमाण्डौ।
एमाले र कांग्रेसको पछिल्लो नयाँ सत्ता समीकरण बन्नुअघि नै एमालेका महासचिव शंकर पोखरेललगायतले अब नेपालमा राजनीतिक ध्रुवीकरण अपरिहार्य रहेको धारणा व्यापक रुपमा उठाए । अहिले एमाले र कांग्रेस मिलेर सरकार चलाईरहँदा पनि उनी मुलुक अब दुई पार्टी सिस्टममा जानु पर्नेमा जोड दिइरहेका छन् ।
गठबन्धनले संकटको व्यवस्थापन मात्र गर्न सक्ने तर राष्ट्रको समृद्धि हासिल हुन नसक्ने बताउँदै उनले राजनीति ध्रुवीकरण अपरिहार्य भएको बताएका हुन् । एमाले महासचिवले खुलेरै मुलुकमा अब धेरै राजनीतिक दल आवस्यक नरहेको बताइरहँदा यता नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले पनि त्यसैको डर आफूलाई लागेको बताएका छन् ।
उनले देशलाई दुई दलीय शासनतिर लैजान खोजिएको भन्दै त्यसलाई रोक्न जनतालाई सुसूचित गर्नुपर्नेमा पनि जोड दिएका छन् । आज पार्टीको अनुशासन आयोग, निर्वाचन आयोग र लेखा आयोगको संयुक्त बैठक समापनको क्रममा बोल्दै अध्यक्ष प्रचण्डले देशलाई दुई दलीय शासनतिर लान खोजिएको बताएको पार्टीका प्रवक्ता अग्निप्रसाद सापकोटाले जानकारी दिए ।
उनले पार्टी कार्यकर्ता र जनतालाई प्रशिक्षित गर्दै पार्टी एकताबद्ध भएर अगाडि बढ्नुपर्ने बताए । बैठकपछि सञ्चारकर्मीहरूसँग कुराकानी गर्दै प्रवक्ता सापकोटाले अध्यक्ष प्रचण्डले सबै प्रतिपक्षलाई समाहित गर्दै अघि बढ्नुपर्ने बताएको जानकारी दिए । त्यस्तै संसदमा माओवादी केन्द्रको भूमिकालाई अझ प्रभावकारी बनाउनुपर्नेमा पनि प्रचण्डले जोड दिएको उनको भनाई छ ।
प्रवक्ता सापकोटाले प्रधानमन्त्री केपी शर्मा ओलीसहित एमालेले जनयुद्धलाई हिंसा भन्नु संविधान विपरीत भएको बताए । अध्यक्षसहित सिंगो माओवादीले दुई दलिय पार्टी सिस्टममा लैजान अहिलेको सरकार खासगरी एमाले र काँग्रेस लागि परेको र जनयुद्धलाई समेत हिंसा भन्दै आफूहरुमाथि कानूनी डण्डा चलाउन सक्ने आशंका गरिरहँदा यता एमाले अध्यक्ष एवं प्रधानमन्त्री केपी शर्मा ओलीले पनि त्यसैलाई संकेत गर्दै माओवादी केन्द्रमाथि टिप्पणी गरेका छन् ।
खासगरी माओवादी केन्द्रका अध्यक्ष पुष्पकमल दाहालले अस्थिरता निम्त्याउन चलखेल बढाएको आरोप लगाएका छन् । मंगलबार दिउँसो केन्द्रीय कार्यालय च्यासलमा बसेको पोलिटब्यूरो बैठकमा समसामयिक विषयमा ब्रिफिङ गर्दै ओलीले प्रचण्डमा कुनै बदलाव नआएको बताएका हुन् । ‘प्रचण्डको जहिलेपनि खेल्ने, खेलैखेल खेलेर कहिले को सँग कहिले कोसँग मिलेर सत्ता हत्याउने चरित्रमा कहिल्यै बदलाव आएन,’ प्रधानमन्त्री ओलीले बैठकमा भने ।
उनले प्रचण्डले पनि आफूहरूलाई धोका दिन लागेको थाहा पाएपछि सत्ता परिवर्तन गर्नपरेको पार्टी बैठकमा बताएका थिए । प्रचण्डको चरित्रबारे बोल्दै अध्यक्ष ओलीले अस्थिर, गैरजिम्मेवार, चिन्तन र सोचमा परिवर्तन नआएको लगायतका टिप्पणी गरे । ‘अस्थिर, गैरजिम्मेवार, चिन्तनमा परिवर्तन नआएको, सोचमा परिवर्तन नआएको, लोकतान्त्रिक बन्न नसकेको पात्र हुन्, प्रचण्ड’, बैठकमा ओलीले भनेका थिए ।
प्रचण्डले केही दिनअघि श्रीलंका र बंगलादेशमा जस्तै नेपालमा पनि जनता जाग्ने बेला भएको भन्दै सत्तारुढ दलहरुलाई सचेत रहन चेतावनी दिएका थिए । उनको यो चेतावनीलाई लिएर पनि ओलीले आक्रोस पोखे । नेपाल कहिले पनि श्रीलंका र बंगलादेश हुन नसक्ने बताए । यस्तै काँग्रेसका महामन्त्री गगन थापाले पनि प्रचण्डको सो अभिब्यक्ति उनीतर्फ पनि लागु हुने भन्दै यस्ता गैरजिम्मेवारपूर्ण अभिब्यक्ति नदिन र यसबारे सोच्न सुझाएका थिए ।
यस्तै ओलीले गत भदौ १० गते टुँडिखेलमा आयोजित गौरा पर्व कार्यक्रममा आफू र कांग्रेस सभापति शेरबहादुर देउवाविरूद्ध भएको नाराबाजीमा पनि माओवादीको हात रहेको आशंका गरे । त्यस घटनामा तीन जनालाई पक्राउ गरिएको थियो । पक्राउको विरोध हुन थालेपछि उनीहरूलाई जनही ९ हजार रुपैयाँ धरौटीमा रिहा गरिएको थियो ।
यस्तै प्रकारका अरू अराजक र अनुशासनहीन गतिविधि अन्य ठाउँमा पनि हुन सक्ने ओलीले संकेत गरे । यसको प्रतिवादका लागि तयार रहन पनि उनले निर्देशन दिए । अध्यक्ष ओलीले प्रचण्डलाई लक्षित गर्दै सत्ताबाट हट्नुपरेको पीडा विभिन्न रूपमा प्रकट गर्न थालेको बताएका थिए । ओलीले प्रचण्ड र माओवादीका बारेमा यस्ता टिप्पणी गरिरहँदा यता माओवादीले भने सरकारविरुद्ध संघर्ष गर्ने तयारी भइरहेको बताएको छ ।
अग्निप्रसाद सापकोटाले भ्रष्टाचार नियन्त्रण, लोकतन्त्र र जनजीविकाको सवालमा आफ्नो पार्टी नेतृत्वको सरकारले चालेका कदम उल्ट्याउने काममा सरकार लागि परेको जिकिर गर्दै त्यसका विरुद्ध सदन र संघर्ष दुवै संघर्ष चर्काउने तयारीमा आफूहरु रहेको बताएका हुन् । सापकोटाले सरकार र सत्तारुढ दलका नेताहरुविरुद्ध जनमत उर्लेको भन्दै आफ्नो पार्टीले प्रतिरोध गरेर अघि बढ्ने बताए ।
उनले संविधान संशोधनको नाममा दुई दल सम्मिलित सरकारले जनताको अधिकार खोज्ने चेष्टा गरेकाले त्यसको विरुद्ध जमेर प्रतिवाद गर्ने नीति पार्टीले लिएको पनि बताए । कांग्रेस एमाले नेतृत्वको सरकार इमान्दार नभएकाले विभिन्न कार्यक्रममा प्रधानमन्त्री र सत्ता साझेदार नेताका विरुद्धमा जनमत उर्लिन थालेको उनको दाबी थियो ।
