२२ भदौ , एजेन्सी ।
भारतले मध्यम दूरीको ब्यालेस्टिक मिसाइल अग्नि–४ सफलतापूर्वक प्रक्षेपण गरेको छ । रक्षा मन्त्रालयको बयानका अनुसार यसलाई ओडिशाको चंडीपुरको एकीकृत परीक्षण दायराबाट शुक्रबार प्रक्षेपण गरिएको थियो । यो प्रक्षेपणले यसको परिचालन र प्राविधिक मापदण्डहरू पूरा गरेको जानकारी दिइएको छ । अग्नि–४ मिसाइल स्ट्रेटजिक फोर्सेज कमान्ड अन्तर्गत प्रक्षेपण गरिएको थियो ।
अग्नि–४ को सफल परीक्षणलाई भारतका लागि निकै महत्त्वपूर्ण मानिएको छ किनभने यो भारतको परमाणु प्रतिरोध कार्यक्रमको हिस्सा हो । अग्नि–४ मिसाइलको दायरा ४ हजार किलोमिटरभन्दा बढी छ । यसअघि भारतले यो वर्षको अप्रिलमा ओडिशाको तटमा रहेको अब्दुल कलाम टापुबाट १ हजार देखि २ हजार किलोमिटरसम्म मार हान्न सक्ने नयाँ पुस्ताको परमाणु सक्षम अग्नि प्राइम ब्यालेस्टिक मिसाइल सफलतापूर्वक प्रक्षेपण गरेको थियो ।
अग्नी ४ निकै नै शक्तिशाली मिसाइल बताइएको छ । यसले भारतीय सेनाको मार हान्ने क्षमता निकै बढाउँने छ । यो मिसाइल दुश्मन देशहरुका लागि चुनौती बनेको भारतीय मिडियाहरुले जनाएका छन् । भारतको रक्षा एवं अनुसन्धान विकास संगठनले दुई वर्षअघि ६ जुन २०२२ मा पनि यसको परीक्षण गरेको थियो ।
सामरिक बल कमान (एसएफसी)ले रक्षा अनुसंधान एवं विकास संगठन (डीआरडीओ)संग मिलेर यसको सफल उडान परीक्षण गरेको थियो । अग्नि मिसाइल भारतद्वारा विकसित एक ब्यालेस्टिक मिसाइल हो । यो लामो दूरीको परमाणु हतियार लैजान सक्षम छ । यो जमिनदेखि जमिनसम्म मार हान्ने ब्यालेस्टिक मिसाइल हो ।
अग्नि–४ अधिकतम ९०० किलोमीटरको उचाईसम्म सिधा उडान भर्न सक्छ । यसको सटिकता १०० मीटर छ । अर्थात हमलाको समयमा यसले १०० मीटरको दायरमा आउने कुनै पनि टारगेटलाई निशाना बनाउन सक्छ । अग्नि–४ को नेविगेशन डिजिटल गरिएको छ । यसलाई ८ बाई ८ ट्रांसपोर्टर इरेक्टर लन्चरबाट प्रहार गरिन्छ ।
