२४ भदौ, एजेन्सी
चौथो संस्करणको युरोपियन नेसन्स लिगमा डेनमार्कले लगातार दोस्रो जित हात पारेको छ । आइतबार राति समूह चरणअन्तर्गत दोस्रो खेल खेलेको डेनमार्कले सर्बियामाथि २-० गोलको जित निकालेको हो ।
घरेलु मैदान पार्केनमा भएको खेलमा डेनमार्कलाई जिताउन अल्बर्ट ग्रोनबाइक र युसुफ पलसेनले एक-एक गोल गरे । खेलको ३६औं मिनेटमा ग्रोनबाइकले गोल गर्दै घरेलु टोलीलाई सुरुआती अग्रता दिलाएका थिए ।
६१औं मिनेटमा पलसेनले गोल गरेपछि डेनमार्कले २-० गोलको जित निकालेको हो । जितसँगै समूह ‘डी’ को डेनमार्कले दुई खेलमा ६ अंक जोडेको छ ।
यसअघि स्विट्जरल्यान्डलाई २-० गोलले हराएको उसले साबिक विजेता स्पेनलाई उछिन्दै शीर्ष स्थान कब्जा गरेको छ । गएराति भएको अर्को खेलमा स्विट्जरल्यान्डलाई हराएको स्पेनसँग चार अंक छ ।
