२९ भदौ, विराटनगर ।
उपसभामुख इन्दिरा रानालाई हटाउने विषयबाट सत्तारूढ दलद्वय नेपाली कांग्रेस र नेकपा एमाले आफैं ब्याक हुने नेकपा (माओवादी केन्द्र)का अध्यक्ष तथा पूर्वप्रधानमन्त्री पुष्पकमल दाहाल ‘प्रचण्ड’ले विश्वास व्यक्त गरेका छन् ।
विभिन्न कार्यक्रमका लागि पूर्व भ्रमणमा रहेका प्रचण्डले शनिबार विराटनगर विमानस्थलमा सञ्चारकर्मीसँग कुरा गर्दै उपसभामुख हटाउने एजेन्डाबाट कांग्रेस–एमाले आफैं ब्याक हुने विश्वास व्यक्त गरेका हुन् ।
उपसभामुखबाट केही प्राविधिक त्रुटी भए पनि पदबाटै हटाउनेखाल गल्ती नभएको प्रचण्डको भनाइ छ । उनले भने, ‘उपसभामुख एउटा इमानदार, जनजाति महिला, बालबच्चाको लागि ख्याति प्राप्त हुनुहुन्छ । उहाँले टेक्निकल्ली केही कुरा नजानेर त्रुटी गर्नुभयो । त्यसको सजाय उपसभामुखबाट हटाउनेसम्म जानु हुँदैन भन्नेमा हामी दृढ छौँ । सायद उहाँलाई हटाउने कुराबाट कांग्रेस–एमाले नै पछि हट्नु हुन्छ होला ।’
