काठमाडौँ,असोज ७
प्रधानमन्त्री केपी शर्मा ओली केपी शर्मा ओली संयुक्त राष्ट्रसंघको ७३ औँ महासभामा सहभागी हुन शनिबार राति एत्तिहाद एयरको विमानबाट न्यूयोर्क प्रस्थान गरेका छन् । प्रधानमन्त्री ओलीले महासभालाई असोज ११ गते सम्बोधन गर्ने कार्यक्रम रहेको छ।
प्रधानमन्त्री ओलीले असोज ८ गते सोमबार ‘नेल्सन मन्डेला शान्ति शिखर बैठकका रूपमा उच्चस्तरीय पूर्ण बैठकलाई सम्बोधन गर्ने कार्यक्रम छ । प्रधानमन्त्री ओली तथा श्रीमती राधिका शाक्य सोही साँझ अमेरिकी राष्ट्रपति डोनाल्ड ट्रम्प तथा श्रीमती मेलानिया ट्रम्पले आयोजना गर्ने स्वागत समारोहमा सहभागी हुने कार्यक्रम छ ।
यस्तै प्रधानमन्त्री मंगलबार संयुक्त राष्ट्रसंघका महासचिव गुटेरेसले आयोजना गर्ने दिवाभोजमा सहभागी हुनेछन् । प्रधानमन्त्री न्यूयोर्कबाट दक्षिण अमेरिकी मुलुक कोस्टारिका जाने छन्। उनी शनिवार असोज १३ मा कोस्टारिकाको राजधानी सान जोसे जाने कार्यक्रम रहेको छ।
कोस्टारिकाका राष्ट्रपति कार्लोस अलभाराडो क्यूसाडाको मैत्रिपूर्ण निमन्त्रणामा प्रधानमन्त्री कोस्टारिका जान लागेका हुन्। प्रधानमन्त्री कतार एयरको विमानबाट असोज १८ गते बिहीबार अपराह्न स्वदेश फर्कने छन्।
प्रधानमन्त्रीको अनुपस्थितिमा १३ दिन कार्यवाहक प्रधानमन्त्रीको जिम्मेवारी मन्त्रिपरिषद्का वरिष्ठतम सदस्य उपप्रधानमन्त्री ईश्वर पोखरेललाई दिइएको छ। संविधान अनुसार राष्ट्रपतिले पोखरेललाई कार्यवाहक प्रधानमन्त्रीको जिम्मेवारी तोकेकी हुन् ।
