७ असोज, एजेन्सी ।
स्पेनिस ला लिगा फुटबलमा बार्सिलोनाले छैटौँ जीत निकालेको छ । उसले भिल्लारियललाई हराउँदै यो जीत हासिल गरेको हो । भिल्लारियलको घरेलु मैदान सिरामिका स्टेडियममा गएराति भएको खेलमा बार्सिलोनाले भिल्लारियललाई ५–१ गोलले हराएको हो ।
जीतपछि शीर्ष स्थानको बार्सिलोनाको ६ खेलबाट १८ अङ्क पुगेको छ । समान खेलबाट ११ अङ्क जोडेको भिल्लारियल भने पाँचौँ स्थानमा छ । उसको यो दोस्रो हार हो । बार्सिलोनाको जीतमा रोवर्ट लेवान्डोस्कीले खेलको २० औँ मिनेटमा गोल गर्दै सुरुआती अग्रता दिलाएका थिए ।
त्यसको १५ मिनेटपछि उनले अग्रता दोब्बर बनाए । यद्यपि ६७ औं मिनेटमा लेवान्डोस्कीले पेनाल्टी पाए पनि सदुपयोग गर्न सकेनन् । योसँगै उनी ह्याट्रिक गर्नबाट चुके । लेवान्डोस्कीले सुरुका ६ खेलमा ६ गोल गरेका छन् । उनी सर्वाधिक गोलकर्ताको सूचीमा शीर्ष स्थानमा छन् ।
यस्तै बार्सिलोनाका लागि पाब्लो टोरेले १ र राफिन्हाले २ गोल थपे । खेलको ३८औँ मिनेटमा अयोज परेजले गोल एक गोल फर्काउनु बाहेक भिल्लारियलले अरु कुनै गोल गर्न सकेन । यसबीच बार्सिलोनाका कप्तान एवं गोलकिपर टेर स्टेगेन घाइते हुन पुगे ।
स्टेगेनलाई मध्यान्तरअघि स्ट्रेचरमा राखेर मैदान बाहिर लगिएको थियो । बार्सिलोनाका अध्यक्ष जोआन लापोर्टाले उनको लिगामेन्ट च्यातिएको जस्तो देखिएको बताएका छन् । तर, थप परीक्षण उनले बताए ।
स्थानीय सञ्चारमाध्यमका अनुसार टेर स्टेगेनलाई मैदानबाट एम्बुलेन्समा अस्पताल लगिएको थियो । त्यसपछि उनी ह्वीलचेयरमा बसेर अस्पतालबाट बाहिरिएका थिए । उनको स्थानमा रिजर्व गोलकिपर इनाकी पेनाले स्थान लिएका थिए ।
डेनी ओल्मो, फ्रेन्की डी जोङ, गाभी र रोनाल्ड अराउजोजस्ता खेलाडीबिना नै मैदान उत्रेको फ्लिकको बार्सिलोना अझ समस्यामा देखिएको छ । यस्तै गएरातिको अर्को खेलमा रायो भालेकानो र एथ्लेटीको मड्रिडले १–१ गोलको बराबरी खेलेका छन् ।
यता इङ्ग्लिस प्रिमियर लिग(इपिएल) मा आइतवार भएको खेलमा म्यानचेष्टर सिटी हारबाट जोगिएको छ । खेलको अन्तिम मिनेटमा जोन स्टोनेसले गोल गरेपछि सिटी हारबाट जोगिएको हो । पाँचौ खेलमा अपराजित सिटीले आर्सनलसँग २–२ को बराबरीमा रोकिएको हो ।
घरेलु मैदान इत्तिहादमा सिटीले अग्रता बनाएपनि जित निकाल्न सकेन । बराबरीका लागि पनि अन्तिम समयसम्म कुर्नु पर्यो । सिटीको लागि एर्लिङ हालाण्ड र जोन स्टोनेसले गोल गरे । आर्सनलका लागि निकार्डो कालाफिओरी र गाब्रिअल मगालहाल्सले गोल गरेका हुन् ।
नवौं मिनेट हालाण्डको गोलमा सिटीले अग्रता बनाएको थियो । साभिन्होको पासमा २२औं मिनेटमा रिकार्डोले आर्सनलका लागि बराबरी गोल गरे । पहिलो हाफको इन्ज्युरी समयमा आर्सनलका लागि गाब्रियलले गोल गर्दै २–१ को अग्रता बनाए ।
पहिलो हाफको इन्ज्युरी समयमा नै आर्सनलका लेआन्द्रो ट्रोसार्डले रातो कार्ड पाएका थिए । दोस्रो हाफ पुरै १० खेलाडीमा सिमित आर्सनलविरुद्ध बराबरी गोल गर्न सिटीले खेलको इन्जुरी समय पर्खनु परेको थियो ।
स्टोनेसले इन्ज्युरी समयको अन्तिम मिनेटमा गोल गर्दै साविक विजेताको सिजनको पहिलो हार टारे । बराबरीपछि सिटी ५ खेलबाट १३ अंकसहित शीर्ष स्थानमा छ । सिटीको समान खेलमा १२ अंक रहेको लिभरपुल दोस्रो स्थानमा झर्यो । आर्सनल ११ अंकसहित चौथो स्थानमा छ । अर्को खेलमा नटिङघम फरेस्ट र ब्राइटनले पनि २–२ को बराबरी खेलेका थिए ।
