२७ असोज , विराटनगर ।
चाडपर्वको बेला राजमार्ग अवरुद्ध हुँदा यतिबेला यात्रुहरुले निकै सास्ती पाएका छन । यसपालि अशोज दोश्रो साताको अविरल वर्षासँगै बाढी पहिरोका कारण नेपालमा २४० भन्दा बढीको ज्यान गएको थियो भने सडकपूर्वाधारमा अर्बौको क्षति भएको छ ।
जसको यकिन विवरण अझै आइसकेको छैन । यद्यपि, ठाउँ ठाउँमा अबरुद्ध सडकहरु खुलाउने प्रयास जारी छ । यसैबीच हेटौँडा कुलेखानी फाखेल भएर काठमाडौँ जाने सवारी साधनलाई वैकल्पिक सडक प्रयोग गर्न प्रहरीले आग्रह गरेको छ ।
यो सडक खण्डमा पर्ने इन्द्रसरोवर गाउँपालिका–२ र ३ स्थित हेभीमा सडक बिग्रेकाले वैकल्पिक सडक प्रयोग गरेर काठमाडौँ हेटौँडा आवत जावत गर्न आग्रह गरिएको जिल्ला प्रहरी कार्यालय मकवानपुरका डीएसपी श्याम अर्यालले जानकारी दिए ।
‘हेभीको उकालोमा इभी गाडीहरु उक्लिन नसक्ने देखियो,’ उनले भने, ‘जसले गर्दा त्यहाँ अहिले धेरै सवारी साधन फसेका छन्। त्यसैले हामीले सवारी साधनलाई वैकल्पिक बाटो प्रयोग गर्न आग्रह गरेका हौँ।’ उनले सडक पूर्णरुपमा अवरुद्ध भने नरहेको बताए ।
इलाका प्रहरी कार्यालय भीमफेदीका प्रहरी निरीक्षक ललिता ढकालले हेटौँडाबाट काठमाडौँ जाँदा त्रिभुवनराजपथ अथवा कान्तिलोकपथ गर्न आग्रह गरिएको बताइन् । कुलेखानी सिमखोला नजिक हेभीको उकालोमा साना गाडीहरु चढ्न नसक्नेगरी सडक बिग्रेको उनको भनाई छ ।
यता काभ्रेको पाँचखालमा पहिरो खस्दा अरनिको राजमार्ग एकतर्फी बनेको छ । पाँचखाल नगरपालिका– ८ मा गएराति करिब १० बजे सुख्खा पहिरो खस्दा अरनिको राजमार्ग अवरुद्ध भएको थियो । उक्त पहिरो पन्छाएपछि आइतबार बिहान नौ बजेदेखि सडकमा एकतर्फीरुपमा गाडी चल्न थालेका हुन् ।
अरनिको राजमार्ग अन्तर्गत काभ्रेको पाँचखाल नगरपालिका– ८ पचास किलो भन्ने ठाउँमा पहिरो खस्दा रातभरी सडक पूर्णरूपमा अवरुद्ध भएको थियो । स्थानीय निकाय र सडक विभागसँग समन्व्य गरेर पहिरो एकतर्फी रुपमा हटाइएको छ ।
बाँकी पहिरो पनि पन्छाउने काम भइरहेको जिल्ला प्रहरी कार्यालय काभ्रेका सूचनाअधिकारी मिनबहादुर घलेले जानकारी दिए । यसैबीच यात्रुबाहक बसमा माथिबाट खसेको ढुंगा लागेर एक बालिकाको मृत्यु भएको छ ।
त्रिभुवन राजपथको हेटौडा–भैंसे सडकखण्डका भुलभुलेमा माथिबाट खसेको ढुंगा लागेर बसका यात्रु मकवानपुरगढी गापा ८ की १२ वर्षिया रिकु थिङको मृत्यु भएको हो । त्रिभुवन राजपथ हुँदै भीमफेदीको ईचुङतर्फ जाँदै गरेको बा.प्र.०३–००१ ख ३३१० नं. को यात्रु बोकेको लोकल बसमा अचानक माथि भिरबाट ढुङ्गा खसी बसकी यात्रु थिङ घाइते भएकी थिइन् ।
हेटौंडा अस्पतालमा सामान्य उपचारपछि उनलाई थप उपचारका निम्ति चितवन लगिएको थियो । उपचारकै क्रममा थिङको मृत्यु भएको जिल्ला प्रहरीले कार्यालय हेटौंडाले जनाएको छ ।
